Imprimir

Fernando Abreu presenta "Ninety milles", primeira peza musical en solitario

Gloria Montenegro | 12 de xaneiro de 2021

Praia homónima que inspirou o tema "Ninety milles" de Fernando Abreu
Praia homónima que inspirou o tema "Ninety milles" de Fernando Abreu
Fernando Abreu, clarinetista de Salvaterra de Miño, aproveitou o seu aniversario para regalar aos seus amigos nas redes o tema que abre o que será o seu primeiro traballo en solitario, "unha obra de arte composta por literatura, fotografía e, por suposto, música". 

O máis normal é que no aniversario dun se reciban presentes, non que se ofrezan, pero o clarientista Fernando Abreu (1967, Salvaterra de Miño) decidiu saltarse os estándares sociais e regalar aos seus amigos nas redes "por todo o cariño que recibo neste 54 aniversario" algo inédito, unha peza musical. 


"Ninety milles" é o nome do tema que abre o seu primeiro disco en solitario, que se chamará Calma. Unha "obra de arte a tres bandas: literatura, fotografía e, por suposto, música", que espera poder presentar antes de Semana Santa, fai saber Abreu nunha conversa con Nós Dario.


O tema instrumental leva o nome dunha praia ao norte de Nova Zelanda, onde residiu durante uns meses e onde compuxo esta peza ao piano. "A localización é impresionante, cando a marea está baixa os vehículos poden circular por ela e a sensación de estar aí é como a de permanecer no medio da inmensidade". Iso mesmo é o que quere transmitir no seu primeiro videoclip, con imaxes gravadas por el mesmo na praia   neozelandesa e editado polo seu irmán, Gus Abreu. 


O disco, "composto sen obxectivo de ser publicado, nace durante o confinamento e para as sesións en liña de Voarte" (plataforma xerada por Víctor Orive baseada na sinerxía de artes e técnicas psicocorporales para a autorrealización). Vendo que existía "material digno de ser gravado díxenme, 'voume dar o capricho de facer un disco propio'", conta Abreu.


Aínda que se denomine como traballo en solitario "teño numerosas colaboracións dentro deste proxecto, xa que quixen que fose algo familiar e dedicado aos amigos". Por iso conta con achegas de amigos músicos como Alberto Vilas, responsabel da interpretación ao piano en todas as pezas ou a súa ex alumna Silvia Mella, quen se encarga da parte fotográfica. 


Dentro do repertorio, existen cancións con grandes historias como "Para Luisa": "É unha compañeira dos obradoiros que toca a guitarra de maneira amateur; un día mandoume unha aromonía que lle facía sentirse ben mentres superaba a Covid e a partir de aí fun improvisando a melodía co clariente e cunha frauta de cana". 


Calma tamén contará cunha parte literaria, na que "diferentes persoas relacionadas cos temas dunha maneira ou doutra escribirán un pequeno texto sobre estes", conta Abreu.

Podes ver este artigo na próxima dirección /articulo/cultura/clarinetista-fernando-abreu-presenta-seu-primeiro-tema-solitario/20210112203409113615.html


© 2021 Nós Diario