Esta terza feira 8 de outubro representantes de CCOO e cargos públicos concentráronse diante das dependencias xudiciais de Ferrol para arroupar as traballadoras e traballadores denunciados na protesta do persoal de Alcoa do pasado 28 de marzo diante do Congreso en Madrid.
Nesta ocasión compareceu por videoconferencia o secretario xeral de Industria de CCOO-Galicia, Victor Ledo. O sindicalista foi citado en calidade de investigado por un presunto delito de atentado á autoridade.
Entre as persoas denunciadas están tamén o presidente do comité de empresa de Alu Ibérica LC (antiga Alcoa-A Coruña), Juan Carlos López Corbacho, así como outros dous traballadores afiliados a CCOO. En relación aos cargos públicos, están denunciados as deputadas e deputados de Unidas Podemos Rafa Mayoral, Antón Gómez-Reino, Ángela Rodríguez e Yolanda Díaz.