Causa Galiza chama a votar BNG

A organización independentista Causa Galiza acordou solicitar “ás independentistas galegas e galegos” o voto “táctico e masivo” no BNG.

Causa Galiza. Día da Patria Galega 2017
photo_camera Causa Galiza. Día da Patria Galega 2017

Causa Galiza acordou manter a posición adoptada en abril e volver pedir o voto para o Bloque Nacionalista Galego. Racha, así, coa súa tradicional posición abstencionista. Considera que as e os independentistas galegos deben votar de maneira “masiva” o BNG por dez razóns.

En primeiro lugar cita “a crise mais importante do regime instaurado na Galiza desde a reforma cosmética do franquismo em 1978”. Sinala que “o exercício do direito de autodeterminaçom das naçons sem Estado que componhem o Reino de Espanha evidencia ser o calcanhar de Aquiles deste regime político”.

En segundo lugar, alude á “possibilidade dumha Grosse Koalition à espanhola entre os principais partidos do regime, ou dumha coligaçom de direitas fascistas e filofascistas, é umha provabilidade imediata para estabilizar o regime e dar continuidade ao neofranquismo para um novo ciclo histórico”.

Tamén pon de manifesto que “a extrema direita espanhola e o PSOE defendem um modelo de Estado substancialmente idêntico nas questons nucleares”. Carga contra o PSOE pola “salvagem repressom” en Catalunya e pola aplicación do artigo 155 polo procés, entre outros factores.

“De umha ótica galega, a perspectiva da permanente instabilidade política do Estado e o seu condicioniamento por forças nacionalistas e independentistas é a opçom preferível”, mantén Causa Galiza no quinto punto do seu acordo.

A formación política admite carecer a día de hoxe da capacidade para “articular a sua própria proposta na frente eleitoral e institucional e contribuir, assim, junto a outras opçons rupturistas, para alargar e agudizar a crise do regime também na instáncia parlamentar”. “Este impedimento insuperável a curto prazo força a elegir entre outras opçons desde a premissa de que a presença parlamentar de opçons nacionalistas e, em especial, independentistas, é o único fator capaz de represar no imediato o desenho de máximos da burguesia”.

Causa Galiza afirma que “as opçons reais e imediatas som duas: a abstençom ou o voto tático num projeto político, o do BNG, com o que sustentamos importantes diferenças nas concepçons táticas e na perspectiva estratégica”. Indica ademais no punto sétimo que desbota o abstencionismo, pois “o bloqueio do regime a curto prazo nom se conjura com um abstencionismo auto-referencial de consumo interno”.

O voto no BNG, defende a forza política, “aparece como a opçom tática mais acertada entre as possíveis”. “Esta petiçom nom é um assentimento à linha da atual dirigência nacionalista ou a procura de integraçom”, aclara Causa Galiza, que afirma no punto noveno que “a mera presença parlamentar de deputados e deputadas politicamente galegas em Madrid, por si soa, em ausência dumha estratégia independentista sobre o terreno, é incapaz de alterar no mais mínimo o nosso histórico status colonial.

Conclúe Causa Galiza apostando na “construçom dum movimento independentista forte, com imbricaçom social, que conjugue a luita ideológica, institucional e de massa, que se articule por volta dum projeto político amplo e plural sob um mínimo denominador comum rupturista. Lembra que ese “é o sentido do Processo Trevinca”.

O BNG segue a sumar apoios

Nos últimos días, persoas con proxección pública anunciaron nas redes sociais o seu apoio ao BNG: Encarna Otero, María Reimóndez, Eli Ríos, Suso de Toro, Alfonso Zarauza, Vítor Mosquera, Quico Cadaval, Xoán Antón Pérez Lema ou Manuel Antelo foron algúns dos que compartiron a súa opción electoral polo nacionalismo galego. Tamén Alexandra Fernández, ex deputada de En Marea, desexou "o mellor" para o BNG nas eleccións do 10-N e o ex portavoz nacional do Bloque Anxo Quintana salientou que o BNG disputa en Galiza escanos á dereita "en calquera das súas versións" polo que, cuns bos resultados para o nacionalismo, mataríanse "dous paxaros dun tiro". 

Comentarios