Rodrigo Sorogoyen, cineasta madrileño con dous Goyas no currículo e autor da curta Madre -que se poderá ver en Cans- nominada aos Oscar será un dos principais protagonistas da cita, que esta cuarta feira presentou a súa programación completa. Con dúas sección centrais, Ficción e Animación con dez e cinco filmes respectivamente, unha retrospectiva do alemán Hannes Stöhr e pezas dos portugueses Paulo Furtado ou Pedro Maia, o director do certame Alfonso Pato salientou “o carácter cada vez mías internacional do festival”. Autoras galegas, armenias, francesas, españolas ou suízas ratifícano.
E heteroxéneo. Porque ademais haberá unha liña transversal de programación, dedicada a filmes de perspectiva feminista e co epígrafe de Ultravioleta. Que tamén se reflectirá nas actuacións musicas. Ao cabo, co paso das edicións, a música erixiuse no outro grande polo de atracción de Cans.
Este ano comparecerán nos escenarios Wyoming e Los Insolventes, o preciosista pop electrónico de Aries, o rock punk de combate de Dakidarría -en formato acústico para a ocasión-, o folk de Raiceira, a canción de autora de Su Garrido Pombo ou o “particular soul” de Patricia Moon.
Outra das seccións paralelas titúlase Fillas e fillos de cans, e dedícase a filmes de cineastas conectados co festival. Estrearase Beiras. Vivir 2 veces, de Jorge Coira sobre a traxectoria do político nacionalista, e El Santa Isabel, de Paula Cons. O encontro 20 anos de Mareas Vivas servirá para que os actores daquela mítica teleserie lembren a efeméride.
No xurado das seccións oficiais están as actrices Cris Iglesias -coñecida polo seu traballo en Chévere, cuxo filme baseado en Eroski Paraíso preestréase en Cans- e Melania Cruz, o músico Xosé Manuel Budiño e os cineastas Andrés Goteira -director de Dhogs-, Alberto Vázquez, Zaza Ceballos e Juanjo Giménez. No de non ficción, os cineastas Xacio Baño e Liliana Torres e a xornalista francesa Isabelle La Gonidee. No de videcolpis, o realizador Carlos Alberto Alonso, a compositora Patricia Moon e o músico Paco Serén. Veciñas como Suso do Placer, Mercedes da Graña, Lourdes do Monte, Mucha de Luis e Iván Táboas completan os xuris.
O 16ª Festival de Cans organízao a asociación cultural Arela e conta co apoio do Concello do Porriño, a Deputación de Pontevedra, a Agadic e o patrocinio de Gadis ou Estrella Galicia.
![Fillas de Cassandra na gala aRi[t]mar 2023.](/asset/zoomcrop,480,270,center,center/media/nosdiario/images/2024/03/27/2024032717434116054.jpg)
