O espolio dos Franco

O BNG insta o concello da Coruña a emprender unha demanda xudicial para recuperar a Casa Cornide

O portavoz municipal do BNG na Coruña, Francisco Jorquera, anunciou que instará no vindeiro pleno o goberno municipal da cidade a emprender accións legais para recuperar a Casa Cornide para a titularidade pública, xa que foi “por medios fraudulentos” agasallado a Franco. A propiedade deste singular edificio segue en mans da familia do ditador.

Toma simbólica da Casa Cornide na Coruña por militantes do BNG
photo_camera Toma simbólica da Casa Cornide na Coruña por militantes do BNG

Após a Avogacía do Estado ter apresentado nos xulgados unha demanda para exixir á familia Franco a devolución do Pazo de Meirás á titularidade pública, Francisco Jorquera, portavoz do BNG no concello da Coruña, anunciou esta segunda feira 15 de xullo que instará ao goberno municipal a emprender acción legais para recuperar a Casa Cornide.  

Desde o BNG saúdan a iniciativa da avogacía do Estado para reclamar xudicialmente a devolución do Pazo de Meirás e considérano un mérito do conxunto das persoas e colectivos sociais que reclamaron a devolución do Pazo, como as e os 19 de Meirás denunciados pola familia Franco, e agradeceron tamén o labor da Deputación da Coruña e de investigadores como Carlos Babío e Manuel Pérez, autores da obra Meirás, un pazo, un caudillo, un espolio.

“O espolio dos Franco non se reduciu a Meirás”, afirmou Francisco Jorquera, quen sinalou que “múltiples actores sociais reclamamos tamén a devolución da Casa Cornide"

“O espolio dos Franco non se reduciu a Meirás”, afirmou Francisco Jorquera, quen sinalou que “múltiples actores sociais reclamamos tamén a devolución da Casa Cornide para que remate en mans publicas, de onde nunca debeu saír”. Ese edificio histórico albergou a comezos do século XIX o concello e foi de titularidade pública até que, a través dunha operación fraudulenta, foi entregado á familia Franco.

A concelleira do BNG Avia Veira denunciou tamén na rolda de prensa que a operación pola que se entregou Casa Cornide a Franco realizouse través dunha “poxa amañada dun ben que foi de titularidade pública até o ano 1962”. A nacionalista sinalou que mediante esa poxa pretendeuse agochar un agasallo directo das administracións a Franco e a súa muller. “No traballo de investigación Meirás. Un pazo, un caudillo, un espolio, de Carlos Babío e Manuel Pérez demóstrase como se realizou unha permuta por parte do concello, Ministerio de Educación e Ministerio de Facenda e posteriormente unha poxa amañada onde participou o subsecretario do Movemento na Coruña e máis Pedro Barrié de la Maza para, finalmente, nunha suposta venda, ceder o pazo á familia Franco”, esgrimiu Avia Veira.

Avia Veira denunciou na rolda de prensa que a operación pola que se entregou Casa Cornide a Franco realizouse través dunha “poxa amañada dun ben que foi de titularidade pública até o ano 1962”

“Queda todo isto ben ilustrado na carta de Ricardo Catoria, secretario persoal de Franco a Juan Sánchez-Cortés, subsecretario do Ministerio de Facenda naquel momento”, asegurou Francisco Jorquera, quen leu un extracto desa misiva na que o primeiro comunica ao segunda a fin do prazo da poxa da “casa que tanto desexaba a súa excelencia”.

Jorquera leu nesa carta as palabras de Ricardo Catoira: “Hoxe reúnese o pleno deste concello para adxudicar a Casa Cornide a un particular e este vendela á señora -en referencia a Carmen Polo, muller de Franco-, así llo explicamos á súa excelencia por ser a mellor forma, xa que así non se fai unha adxudicación directa de bens que foron do Estado ao caudillo. Os señores -en referencia aos Franco- están encantados de ter unha casa na Coruña para que cando teña que desprazarse a señora non haxa necesidade de abrir o Pazo de Meirás, que tantas molestias ocasiona polo seu gran tamaño e número de serventes. O caudillo e a señora están moi agradecidos pola súa xestión”.

Explicou Jorquera que o concello cedera anteriormente o edificio ao Ministerio Educación para albergar nel un conservatorio, mais co obxectivo de agasallarllos a Franco e evitar facer unha transferencia directa, “o que se fixo foi unha permuta para o Estado darllo ao concello de novo a cambio duns terreos, e así o concello puido darllo a Pedro Barrié e este ao seu tempo cedeuno de inmediato a Franco”. Engadiu Jorquera a este respecto que “na figuraba unha cláusula pola que en dez anos non se podería ceder o edificio, mais o propio pleno municipal cambiou esa condición para permitir a inmediatez da cesión, tal e como se recolle no estudo de Babío e Lorenzo e tal e como figura na acta do pleno, sinalou Jorquera.

Este escrito “é revelador”, afirmou Jorquera, “de que estamos falando dunha operación fraudulenta para cumprir o antollo de Carmen Polo, quen desexaba unha casa no centro da Coruña”

Este escrito “é revelador”, afirmou Jorquera, “de que estamos falando dunha operación fraudulenta para cumprir o antollo de Carmen Polo, quen desexaba unha casa no centro da Coruña”. Con estas bases documentais, desde o BNG “instamos ao concello a presentar unha demanda xudicial para recuperar para todas as coruñesas e coruñeses este edificio”, e engadiu que “tanto a institución municipal como o Estado están lexitimados para actuar, xa que eran os propietarios”.

O BNG xa apresentou dúas mocións para este fin no pleno da Coruña no anterior mandato, en virtude das cales acordouse comisionar o Consello da Memoria Democrática para realizar un estudo xurídico. “Urxiremos para que o estudo culmine canto antes e poder comezar cos procedementos xudiciais”, sinalou Jorquera.

Movementos sociais veñen reclamando desde hai tempo a devolución do patrimonio espoliado pola familia Franco ao pobo galego, con accións políticas levadas a cabo desde o campo nacionalista en prol da titularidade pública do Pazo de Meirás, reivindicándoo co depregamento dunha pancarta e unha bandeira da Patria desde o seu interior, así como desde os balcóns da Casa Cornide, e de maneira semellante exixiuse tamén a devolución das estatuas de Isaac e Abraham arrincadas do Pórtico da Gloria e agasalladasn a Franco.

Comentarios