Nunha intervención con mencións a Virginia Woolf, Rosalía de Castro, as mulleres antifranquistas ou as cigarreiras da Coruña -protagonistas en 1857 da primeira folga de mulleres na Galiza-, Pontón manifestou a necesidade de “non ter medo”. “Este 8 de marzo, todas as mulleres temos que saír á rúa para dicir alto e claro que non imos permitir 'nin un só paso atrás' dos nosos dereitos”, clamou.
Segundo a portavoz nacional do Bloque, cómpre “sinalar todas aquelas forzas políticas que pretendan dar pasos atrás ou sexan cómplices desa intención”. A referencia á formación de extrema dereita Vox e aos seus pactos co PP foi clara. Contra os retrocesos, mobilización, engadiu.
“O ano pasado fixemos historia na Galiza cun 8M masivo que quedou na retina de moitos e que marcou un antes e un despois”, indicou, “pero somos conscientes de que non abonda con loitar un día ao ano. Queremos seguir avanzando, porque resulta evidente que os que gobernan non tomaron nota. A brecha salarial non se moveu e mesmo medra, as pensións das galegas son as máis baixas, as investigadoras son discriminadas e a conciliación e corresponsabilidade segue a ser unha quimera”.
Ana Pontón insistiu no carácter feminista da organización que lidera: “Incorporamos un gran número de mulleres, unha voceira e dúas vicevoceiras, máis mulleres que homes na Executiva Nacional, e un grupo parlamentario co 70% de mulleres, mais quedan moitos retos por diante”.