O vindeiro 13 de xuño botará a andar a XI Mostra de Cine Etnográfico que organiza o Museo do Pobo Galego. Nesta edición, que durará até o día 18 do mesmo mes, serán 20 os filmes participantes que serán proxectados en tres diferentes salas compostelás: O Salón Teatro, o Teatro Principal e o propio Museo do Pobo Galego.
Esta mostra recolle produccións internacionais de todo tipo coa condición de que mostren aspectos relacionados coas distintas realidades socioculturais e os xeitos de vivir e de entender a vida no seo dunha comunidade. Os filmes deben ter como foco principal ás persoas, grupos sociais ou procesos históricos relevantes relacionados coa antropoloxía e a etnografía.
Entregarase o Premio a mellor producción galega e o Premio ao mellor filme etnográfico
Por primeira vez na historia do festival cinematográfico, entregaranse dous premios, con dotación económica, ao mellor filme etnográfico e á mellor producción galega ou referida a Galiza. No primeiro caso, o premio será de 900 euros e no segundo, de 600. Ademais, existirá un premio entregado polo público que consistirá nun trofeo acreditativo e nun diploma.
As películas participantes son: Baratometrajes - El futuro del cine hecho en España, Una carrera de fondo, Via Crucis migrante, Reveka, District Zero, Verengo, A Seara, Spés, Strana Udehe, 56, Espés, Alpuxarras, Muros, Extremos "Viaje a Karukinka", Bango, Fíos Fóra, Las lágrimas de África, Os días afogados, Los Pelotaris, Cantos y crónicas de una barriada olvidada e Tesouro de Corcoesto.