Lixeira caída das expectativas do PSOE —pasaría de 31,6 por cento no barómetro de outubro a 31,2 no de novembro—, mais mesmo así firme liderado do partido de Pedro Sánchez, que avantaxaría en 12,1 puntos ao segundo clasificado, o PP de Pablo Casado. O promedio dos inquéritos privados acepta que o PSOE vai por diante, mais coloca a marxe entre os tres ou catro puntos.
Novembro recoloca o PP por diante de Cs na loita pola hexemonía no espazo da dereita, 19,1 fronte a 18,2 por cento. A tendencia do partido aínda hexemónico no Congreso dos Deputados é positiva (sobe 0,9 puntos a respecto de outubro), en tanto que decaen os apoios á formación de Rivera e de maneira moi significativa, cedería até 2,8 puntos sobre o mes pasado.
Canto ao conglomerado da esquerda que encabeza Podemos, en que se acha En Marea, a evolución é positiva, cun chimpo do 17,3 de outubro ao 18,1 deste novembro. Ao salto non colabora a confluencia galega, estancada no 0,6 por cento, dato que xa se dera tamén no barómetro de agosto. En xuño de 2016, a coalición formada por Esquerda Unida, Anova e Podemos obtivo nas urnas 1,44 por cento dos sufraxios no conxunto do estado.
Soberanistas
No mapa do soberanismo, ERC continúa a acrecentar apoios, até se colocar no patamar de 4,8 por cento, 5 décimas máis que en outubro. O correlato é o significativo descenso do PDeCAT, que apenas conseguiría 0,8 (face o 1,4 previo). En Euskal Herria, a esquerda abertzale batería con clareza o PNV. O prognóstico para EH Bildu é de 1 por cento do voto face un insolitamente baixo 0,7 para o PNV. En outubro, Bildu xa superara o partido de Urkullu, mais apenas por unha décima, 1,1 fronte 1.
O crédito do CIS
Mais inevitabelmente estas predicións do CIS van ser lidas cos óculos do fiasco do seu recente estudo sobre as eleccións andaluzas. A equipa de analistas comandada por José Féliz Tezanos prognosticara para este 2D entre 45 e 47 escanos para o PSOE (ficou en 33) e apenas 1 por Almería para Vox (acadou 12). Si que se aproximou dentro da marxe de erro normal aos resultados de PP, Cs e Adiante Andalucía. Ao PP infravalorouno (predixo 22 e tivo 26), con Cs acertou de pleno (21) e a Adiante Andalucía adxudicoulle tres máis dos que finalmente lle outorgaron as urnas (20 no canto de 17).
