O apalpador salva relativamente o ano das librarías cunha campaña de Nadal "bastante boa"

O apalpador, alén de castañas e brinquedos, trouxo tamén uns cantos libros. A campaña de Nadal, unha das épocas fortes para as librarías, puxo o feche a un 2021 marcado pola pandemia. "Foi bastante boa, en relación ao que caeu o resto do ano", comenta Antón Pedreira, da coñecida libraría compostelana que leva o seu apelido. Contextualiza ademais que, no seu caso, se deu nun marco de fechamento perimetral. "Moita da nosa clientela non podía vir", polo que os pedidos supuxeron unha parte importante da ecuación, se ben a venda directa na tenda foi o principal. Así as cousas, a facturación destas datas "caeu un pouco" en relación a outros anos, mais Pedreira considera que "se resistiu moi ben". Precisamente desde a Libraría Bahía, con base en Foz, Cielo Fernández sinalan o fundamental para o bo funcionamento da campaña o feito de non teren unha elevada incidencia da Covid-19, con restricións engadidas, nas semanas do Nadal, pois traballan alén do concello con toda a comarca da Mariña. Se normalmente comezaban o 20 de decembro, este ano xa se deixaron sentir desde antes, asegura, e mantivéronse entre Noiteboa e Fin de Ano, unha semana na que tenden a baixar Sen ter aínda as contas feitas, Cano Paz, dono da Libraría Paz de Pontevedra, calcula que as vendas natalicias se mantiveron nos niveis do ano pasado. Porén, apunta que se deron de maneira máis "espaciada". Se normalmente comezaban o 20 de decembro, este ano xa se deixaron sentir desde antes, asegura, e mantivéronse entre Noiteboa e Fin de Ano, unha semana na que tenden a baixar. Na Livraria Suévia da Coruña mesmo notaron un aumento das vendas neste Nadal a respecto de anos previos, sobre todo, proporcionalmente, nos libros para público adulto, que se incrementaron de forma máis acusada que a Literatura Infantil e Xuvenil habitualmente demandada nestas festas. E iso que Ermitas Valencia non as tiña todas consigo. A libreira confesa que contaba cunha baixada, pois moitas persoas adiantaron as compras a novembro aproveitando os bonos Presco, que ofrecían 50% de desconto, dentro dun programa de reactivación do Concello da Coruña -outorgando a cada libraría 5.000 euros para compensar a rebaixa, até esgotaren o fondo. Pero non foi así, o que lles permite, fronte ao que refiren outros negocios, fechar o ano "máis ou menos ben". O presencial gaña A venda directa continúa a ser o punto forte das librarías. Pedreira, ante a imposibilidade de desprazarse a Compostela de moitos clientes, apunta que se levaron a cabo unha serie de pedidos por teléfono ou correo electrónico. "O 99% da nosa venda é presencial", coincide Paz. Pola súa banda, Valencia comenta que desde o confinamento se foi asentando a práctica de facer as encargas a través de What's App ou das redes sociais. Actualmente, no local de Suévia só pode estar unha persoa, polo que adoitan formarse colas fóra. Para evitar isto e permanecer o menor tempo posíbel no lugar, atendendo ás recomendacións sanitarias, moitas persoas optan por facer a encomenda previamente e pasar a recollela. Valencia comenta que desde o confinamento se foi asentando a práctica de facer as encargas a través de What's App ou das redes sociais Algo semellante percibe Fernández: "Cada vez máis xente consulta en liña o que temos", aínda que logo acuda ao local. Así, Bahía traballa maioritariamente con venda física, se ben rexistran un aumento da que se realiza online, a través da súa web ou da plataforma Todostuslibros. Mais non falta quen se achega ao estabelecemento procurando as recomendacións das libreiras ou botar un ollo entre os andeis. Un ano difícil No contexto global, Pedreira indica que as vendas descenderon bastante. "Estivemos máis de dous meses fechados", lembra. Naquela altura as fórmulas foron variadas, mentres algunhas librarías mantiveron certa actividade con envíos a domicilio outras permaneceron totalmente fechadas. A Paz foi das segundas, se ben era posíbel facer encargos para o futuro. Cando abriron en maio, "malamente amortizamos gastos", comenta o dono. Datas importantes como o Día do Libro ou o das Letras Galegas transcorreron entre restricións e dificilmente lograron niveis de anos anteriores. Con todo, Pedreira destaca o cariño recibido nalgúns deses momentos: "Na Feira do Libro a xente volcouse, foi moi emotivo". O libreiro, malia a caída de eventos relevantes como a Semana da Novela Negra, considera fundamental a vontade da xente de "defender as librarías", un agradecemento ao que se unen todas as entrevistadas. "Acabamos mellor do que se esperaba", comenta Fernández, para quen a campaña de Nadal, algo por riba do habitual, fechou o ano nunhas circunstancias non tan malas e observar este 2021 con optimismo. Porén, as librarías sofren con forza as caídas de presentacións e outras actividades, que practicamente "desapareceron", sentencia Paz, mencionando a dificultade de organización e a escasa afluencia de público nas poucas que se manteñen, comprensivo co "medo" que sitúa tras esta situación. "Nós aínda o intentamos", asegura Pedreira, comprometido cun modelo de libraría máis alá do almacén de libros. Valencia engade o impacto de medidas como o feche da hostalaría, que implica "menor fluxo de xente pola rúa". Porén, isto ten a contrapartida de reducir desprazamentos fóra do barrio, a Agra do Orzán no seu caso, o que beneficia o comercio da zona. Aumento da lectura O Observatorio da Cultura Galega, dependente do Consello da Cultura, detectaba o mes pasado no seu estudo sobre como a pandemia afectou o consumo cultural un leve aumento da lectura, en especial da intensidade. Como se traduce isto nas librarías? A resposta é discordante: "Non vendimos máis", asegura Paz, mentres Valencia si percibe un incremento, concretamente entre a poboación adulta. "Cóntanche que comezaron a ler con máis frecuencia", comenta. "Quen antes mercaba unha novela, agora leva tres", di Valencia Pensa que alén do medo, a renuncia a viaxar ou a asistir a outros eventos culturais repercute en que "quen antes mercaba unha novela, agora leva tres". Fernández, igualmente, aprecia que a cancelación de actividades de lecer fai escorar público cara ás librarías. A literatura, como sempre, ese gran refuxio, a eutopía perfecta para escapar do presente ou deterse a (re)pensalo .