A dirección de Alcoa comunicou aos medios na terza feira que lle trasladou ao comité de empresa da planta de Cervo unha proposta "definitiva" co obxectivo de que desconvoque a folga que mantén hai máis de tres meses para sentarse a negociar a venta da factoría a través da Sociedade Estatal de Participacións Industriais (SEPI).
A multinacional do aluminio sinalou esa desconvocatoria como condición para volver sentar a negociar e coa vista posta nesa operación, que o pasado ano resultou frustrada.
Pola súa parte, o persoal representante do cadro de traballadores vai remitir a proposta aos distintos sindicatos "para a súa valoración" e na cuarta feira debaterana nun pleno extraordinario que dará comezo ás 11 horas.
Tras as decisións da xusticia, que impediu que a compañía parase as cubas de electrólise e anulou o despedimento colectivo que pretendía levar adiante, Alcoa volveu a reunirse co comité nestes últimos días sen ningún tipo de acordo. Na segunda feira retomou o encontro, que prolongou á terza feira e no que trasladado a proposta da que agora informa o comité.
A pasada semana, a dirección recriminoulle ao comité propor "exixencias adicionais" e, despois diso, o comité ofertou suspender a folga se a dirección sentaba a negociar e se se comprometía "por escrito" a non parar "ningunha das series" e ao mantemento do persoal e da produción nas instalacións da Mariña.
