Imprimir

"Aí vai unha, aí van dúas, tres castañas polo chan"

Mercedes Espiño | 14 de decembro de 2020

Caldeirada de congro de mariña de Muxía (Foto: Anxo RL).
Caldeirada de congro de mariña de Muxía (Foto: Anxo RL).
Receitas de crema fría de remolacha; caldeirada de congro de mariña de Muxía; e escuma de castañas.

—Crema fría de remolacha ou beterraba de Marisol P.

Elaboración: Cócense as remolachas en auga fría con sal 30 min logo do primeiro fervor. Déixanse arrefriar, móndanse e pícanse. Pártese en anacos a beterraba, o pemento verde, o allo, o tomate pelado e o cogombro. Ponse todo nun vaso de batedor cos iogurtes e o sal. Bátese co aceite de oliva até obtermos unha crema integrada, sen bolos e suave. Resérvase na neveira.

Nota: No canto do aceite, pódese usar a auga de cocción. Comercialízanse beterrabas cocidas.

 

—Caldeirada de congro de mariña de Muxía

Elaboración: Usamos para a caldeirada a parte denominada "congro a toro aberto": do embigo até o principio da cabeza do congro. Tórase para caldeirada en toradas máis grosas (sobre 4 cm) que para fritir. Aréanse os toros con sal gordo e repousan 2 horas. Depelícanse as patacas e pártense en rodas para caldeirada.

Nunha pota con auga fría e con sal, bótanse patacas e cebolas que, logo do fervor, cocen 12 min. Pasados estes, cócese o peixe 7 min. Para o prebe, cócese en aceite a lume manso a cebola picada á xuliana sobre 10 min, engádese o pemento en anacos pequenose guisa todo xunto 10 min.

Esparexemos o pemento doce e o picante, méxese para que non se queime e, de seguido, régase con 125 ml da auga da caldeirada. Méxese e retírase do lume.

Cocidos peixe e patacas, escórreselles a auga e, no mesmo recipiente, bótaselles o prebe por riba da caldeirada, cociñando 3 min para que faga un fervor ou un segundo gusto. Listo para servir.

Nota: Pode servirse coa allada típica (aceite, pemento doce e auga de cocer). A cola, cortada en toros moi delgados, frítese até quedar moi triscante. Ou ben, cocéndoa e tirándolle todas as espiñas, prepárase unha empanada de congro ou ben facemos un caldo para sopa ou arroz.

 

—Escuma de castañas

Elaboración: Fáiselles un corte transversal ás castañas e cocen 5 min en auga a ferver. Estónanse.

Nun cazo cóbrense con leite e cocen de novo a lume medio 10 min logo do fervor, até ficaren moles e tenras.  Retíranse do leite e esmáganse nun pasador de puré ou con batedor eléctrico. Mexendo manualmente, engadimos a manteiga até incorporala. Bótase o cacao, o azucre e as 2 culleradas de brandy, mexendo a man.

Sepáranse as xemas das claras. Engádense as xemas dos ovos unha a unha á mestura e mexemos até integrárense.

Cun batedor de globo, subimos as claras a punto de neve cun chisco de sal, comezando ao mínimo e elevando aos poucos a potencia até o máximo. Únense as claras á mestura anterior moi a modo e con movementos envolventes para que non baixen. Repártese a escuma en recipientes individuais e repousa na neveira como mínimo 2 horas.

Nota: Servimos cunha decoración de lascas de chocolate, follas de menta, graos de améndoa ou serraduras de laranxa.

Podes ver este artigo na próxima dirección /articulo/cocina/ai-vai-ai-van-duas-castanas-polo-chan/20201201110759110455.html


© 2021 Nós Diario