Junts pel Si e a CUP están fechando un acordo que non contempla Mas como president. O propio Mas decidiu renunciar como candidato á Presidencia para facilitar o achegamento das dúas partes e para que se poida avanzar no proces independentista.
Segundo vén de anunciar Mas nunha comparecencia no Palau da Generalitat, o próximo president será o alcalde de Girona e cabeza visíbel da Asociación de Municipios pola Independencia, Carles Puigdemont. Nas últimas horas, soaran tamén con forza os nomes de Muriel Casals e de Neus Munté.
O acordo inclúe que a CUP se compromete a non votar xunto aos grupos contrarios ao proces e ao dereito a decidir
As primeiras informacións xa apuntaban que a CUP aceptaría a substitución dun número importante dos seus parlamentares por partidarios do acordo. Porén, a estas alturas sábese que dous parlamentares da CUP se incorporarán á dinámica de Junts pel Si para garantir a estabilidade parlamentar, tal e como asegurou Mas. Tamén advertiu de que o acordo inclúe que a CUP se compromete a non votar xunto aos grupos contrarios ao proces e ao dereito a decidir.
Pola outra banda, Mas, que renunciou a ocupar calquera cargo público, asegurou que "eu non me retiro da política" e que se centrará en refacer Convergencia.
A decisión de Junts pel Si e da CUP non será oficial até que se lle comunique formalmente á presidenta do Parlament. Segundo Mas, xa chamou Carme Forcadell para informala de que Carles Puigdemont é o novo candidato á Presidencia.