De novo foron as redes sociais as que deron a voz de alerta. A difusión de dous vídeos permitiu denunciar a suposta detención irregular dunha moza ao termo da xornada de protestas da terza feira contra o Goberno de Colombia.
María Fernanda Pérez foi apartada dun grupo que se manifestaba fronte á Universidad Nacional de Bogotá e introducida nun coche que carecía de identificación oficial. Ante os seus gritos, outro mozo gravou os feitos e perseguiu o vehículo policial no seu propio automóbil. Varias mazás máis adiante, logo de se deter, Pérez baixou chorando: “Subíronme supostamente para que no me agredisen máis”.
El #ESMAD quiso desaparecer a una joven, gracias a la valentía de este ciudadano q pudo rescatarla
A la @PoliciaColombia y su línea del #ESMAD los vamos a denunciar a nivel internacional por secuestro y desaparición forzada. Hoy mismo haré un llamado ante el #ComiteInternacional pic.twitter.com/yjK88d96o4— Gener Usuga (@gener_usuga) December 11, 2019![Publicidade 193771]()
A escena, posteriormente difundida polos medios, reavivou as críticas contra o Esmad, o Escuadrón Móbil Antidisturbios, e o resto das forzas de seguridade, e trouxo á memoria a figura de Dilan Cruz, o estudante falecido tras recibir un balazo na cabeza no transcurso dunha das mobilizacións iniciadas o 21 de novembro.
Ante esta situación, a Procuradoría Xeral (a fiscalía xeral colombiana) iniciou onte unha investigación. Con todo, a Policía Metropolitana de Bogotá defendeu a súa actuación. Segundo informa o diario El Tiempo, que tivo acceso ao informe policial, a moza foi "apartada (...) porque se presentaba exaltada". E en conferencia de prensa, o comandante Hoover Penilla sinalou que malia careceren de identificación "os vehículos son institucionais e os seus pasaxeiros eran Policía".
Inhabilitación en Chile
Tamén en Chile as autoridades comezan a dar pasos ─cando menos simbólicos─ para frear os abusos policiais. O Senado aprobou unha acusación constitucional contra Andrés Chadwic, o ministro do Interior durante o inicio das protestas cidadás, posteriormente destituído polo presidente, Sebatián Piñera. A decisión inhabilítao para exercer cargos públicos por cinco anos.
Adoptada por 23 votos a favor e 18 en contra, a medida estabelece que Chadwic ─primo de Piñera─ infrinxiu a Constitución e as leis por non tomar medidas eficaces para evitar a violación dos dereitos humanos.
Informe da CIDH sobre Bolivia
O informe preliminar da Comisión Interamericana de Dereitos Humanos (CIDH) respecto ao conflito postelectoral en Bolivia, feito público esta semana, conclúe que houbo masacres tanto en Sacaba como en Senkata, e mesmo que hai indicios de execucións extraxudiciais. Porén, o Goberno interino de Jeanine Áñez considera que o informe é "nesgado, inxusto, incompleto e inconsistente".
A CIDH, con sede en Washington e dependente da Organización dos Estados Americanos (OEA), cre que os actos de violencia "poden caracterizarse como masacres dado o número de persoas que perderon a vida nun mesmo modo, tempo e lugar, e a que se cometeron en contra dun grupo específico de persoas".
Nos casos de Sacaba e Senkata, a CIDH di que, segundo as testemuñas, as forzas de seguridade dispararon contra concentracións "pacíficas".
