![Frutas Sandra, en Marqués de Pontejos, na Coruña. [Imaxe: Google]](/asset/thumbnail,1280,720,center,center/media/nosdiario/images/2019/10/24/2019102411211927633.png)
Apenas tres días despois de que se producira unha agresión en Madrid ao presidente dos bombeiros galegos, Miguel Ucles, por levar unha camiseta en galego e unha bandeira da patria, na Coruña unha froiteira presentou unha denuncia pola agresión que sufriu a mans dun home co pretexto de que na tenda se venden produtos cataláns.
Segundo informan diferentes medios, a agresión produciuse ao redor das 13:45 horas desta cuarta feira cando o home accedeu á froitería, situada na zona vella da Coruña, moi preto da praza de María Pita nunha área moi transitada por viandantes. A muller, Sandra Castro, estaba soa nese momento e na parte do almacén. O presunto agresor esixiulle que retirara da venda unha caixa de froita que indicaba a procedencia catalá do produto. A muller negouse e empezaron as ameazas. Intentou sacar unha foto do home dicindo que ía denuncialo, mais este arrebatoulle o móbil e golpeouna con dous puñazos na cara. A muller berrou. Un mozo que pasaba por alí detivo a agresión.
Sandra Castro acudiu ao médico e presentou denuncia á Policía Nacional, que investiga o suceso. Fontes policiais indicaron esta mañá que o agresor aínda non foi identificado.
Exaltación
A agresión ten lugar nuns días marcados no Estado por un ambiente mediático, político, e tamén en parte social, de exaltación españolista fronte ao que acontece en Catalunya. Un exemplo é a convocatoria feita recentemente por Francisco Vázquez, ex alcalde coruñés, que apela a concentrarse este domingo na Praza de María Pita "en apoio da constitución e dos cataláns constitucionalistas". Pide o ex rexedor da cidade que as persoas asistan levando como único símbolo a bandeira española.
