En decembro de 2013 o grupo venezuelano Banesco mercaba Novagalicia Banco, o que ficaba das caixas galegas, por 1.003 millóns de euros. Unha adquisición que o maior anco privado de Venezuela facía despois de que o estado dedicase máis de 9.000 millóns de euros a rescatar e ‘sanear’ as entidades galegas. Nacía entón Abanca, e desde entón acumula ganancias nestes anos por máis de 2.600 millóns de euros, unha cantidade 150% superior á que pagou Banesco.
Abanca rexistrou en 2018 un beneficio neto de 430 millóns de euros, o que representa 17,3% máis que no ano anterior, 2017, o "mellor exercicio da súa traxectoria en termos económicos". Así o d manifestou o presidente do banco, Juan Carlos Escotet, na presentación de resultados. A capacidade de xeración de resultados procede "fundamentalmente", segundo Abanca, dos ingresos recorrentes (marxe básica), que medraron en 9,5% como consecuencia de maiores achegas tanto pola vía de intereses como dos ingresos por servizos.
Así, destaca 2018 pola "fortaleza comercial" no negocio bancario e de seguros de Abanca. O volume de negocio con clientes incrementou até os 69.213 millóns de euros sen ter en conta operacións corporativas, 5,6% máis.
Ademais, a entidade reforzou a súa base clientes cun incremento de 12% no número de nóminas domiciliadas, mentres que o número de novos clientes con seguros avanzou en 13%. "
Estes 430 millóns de euros de beneficio súmanse aos 367 millóns obtidos por Abanca en 2017, aos 333 millóns de 2016 e aos 330 de 2015. Abanca obtivo en 2014 un beneficio consolidado de 1.157 millóns de euros após impostos, unha cifra que levou á dirección da entidade financeira a recoñecer que bateron “amplamente” a súa previsión para este primeiro ano da nova etapa.