Poucas posibilidades teñen "Os da Ría" para acadar o posto de "Coordinador-coordinadora do departamento de Xestión" que a AGADIC vén de convocar na súa páxina web. Á vista da convocatoria, a resolución virá da propia Consellería de Cultura, sen recorrer a ningún experto externo nin representante do sector para o concurso. O Secretario Xeral, a Subdirectora de Xestión e Coordinación Cultural e o Xefe de Servizo de Persoal compoñen a comisión que decidirá o nome da persoa que se porá á fronte da Axencia Galega de Industrias Culturais, con sede agora na Cidade da Cultura e vacante desde o mes de novembro nun dos momentos máis duros dos sectores empresariais da cultura.
Segundo a convocatoria que a Consellaría que ten á fronte a Xesús Vázquez vén de facer pública, a persoa que vaia dirixir a AGADIC terá unha retribución de 39.432,89 euros e, para se apresentar, só se require a condición de ter licenciatura.
Case catro meses despois de que Fasero abandonase AGADIC, son numerosas as ocasións nos que representantes dos sectores das artes escénicas reclamaron que se cubra o posto vacante. Só agora, a AGADIC anuncia a convocatoria do concurso, o que mesmo deu para brincadeira no xector, como no caso do vídeo do dúo "Os da Ría" que está a rular polas redes sociais.
