O Parlamento galego aprobou por unanimidade unha proposta do Bloque Nacionalista Galego (BNG) para instar a Xunta que demande á Dirección Xeral da Mariña Mercante reforzar o sistema de alertas en sinistros marítimos.
A proposta foi presentada após se producise o naufraxio do 'Vila de Pitanxo' no mar de Terranova, que deixou en evidencia algunhas das deficiencias no ámbito da seguridade marítima.
En concreto, o Bloque pediu a elaboración dunha mensaxe (alerta rápida) para ser radiado de forma continua como "aviso a navegantes", no que se lembre o preceptivo cumprimento do Regulamento de Comunicacións Marítimas de 2006 para a activación e emisión de alertas de socorro en chamada selectiva dixital, en función da zona marítima na que faenen ou naveguen os distintos buques.
Así mesmo, a iniciativa, aprobada na Comisión de Pesca, chama o Goberno galego á posta en marcha dunha campaña de concienciación dirixida a patróns e mariñeiros sobre os perigos da navegación e a súa prevención.
Cumprimento rigoroso da lexislación marítima
A portavoz de Pesca do BNG, Rosana Pérez, advertiu durante a súa intervención que, após o tráxico afundimento do 'Villa de Pitanxo', é necesario que as administracións incidan no cumprimento rigoroso da lexislación marítima, de forma que se teñan en conta as recomendacións da Comisión Permanente de Accidentes e Incidentes Marítimos ( Ciaim).
Neste sentido, a deputada nacionalista considera necesario que Mariña Mercante "poña todo o acento necesario para tratar de evitar cantos máis sinistros mellor".
Puxo o exemplo de que a Dirección Xeral de Tráfico lembra aos condutores continuamente as normas que hai que cumprir a través das súas campañas preventivas.