martes 14.07.2020

Traballadores de Alcoa cortan a autovía Ferrol-Vilalba

Ergueron barricadas á altura de Xermade e anuncian novas mobilizacións

Imaxe da protesta que cortou a autovía (CIG Alcoa)
Imaxe da protesta que cortou a autovía (CIG Alcoa)

Traballadores de Alcoa San Cibrao cortaron cunha barricada a autovía AG-64 entre Ferrol e Vilalba, á altura do concello de Xermade, nunha nova protesta para esixir unha "solución" á intención da multinacional de despedir 534 operarios.

O corte en ambos os dous sentidos produciuse coa queima de pneumáticos, o que provocou retencións de vehículos na zona onde hai a bifurcación para Viveiro

Esta nova protesta obrigou a Garda Civil a desviar o tráfico desta autovía autonómica que conecta Ferrol con Vilalba.

Centos de traballadores participaron na mobilización, na que se levaron a cabo pintadas e cánticos como 'A Mariña sálvase loitando' e 'Enerxía, solución', entre outras.

Así, os traballadores teñen previsto realizar máis manifestacións e mobilizacións antes das novas reunións que o comité e a dirección de Alcoa terán a próxima semana. O día 18 remata o prazo de tres semanas de contactos informais antes de que se abra a negociación formal para o despedimento colectivo.

comentarios