mércores 27.05.2020

“Subornan encargados con cocaína para poder traballar”

CIG continúa coa publicación de testemuños de traballadores da alta velocidade en Ourense.

Imaxe achegada pola CIG. Segundo o sindicato, a imaxe corresponde a uns operarios durmindo na obra tras xornadas de máis de 12 horas (CIG)
Imaxe achegada pola CIG. Segundo o sindicato, a imaxe corresponde a uns operarios durmindo na obra tras xornadas de máis de 12 horas (CIG)

O sindicato CIG continúa a publicar testemuños de traballadores das obras do AVE en Ourense, confesións que demostran para o sindicato as pésimas condicións laborais destes operarios.

Segundo sinalan dende a Federación de Construción e Madeira (FCM), as críticas ao papel dos encargados son unha constante. “Os enfrontamentos, os problemas para rexistrar (e polo tanto cobrar) o traballo real que se facía na obra, e a actitude escravista, irrespectuosa e mesmo racista cos seus operarios, é un denominador común”. 

“Poñíannos motes en función da raza e da nacionalidade, e nos partes de traballo eramos Morito 1, Morito 2...”. indica a CIG que lles narrou Abdullah, un operario árabe afiliado á CIG desde hai tres anos. “Os encargados eran os que decidían quen traballaba, como e cando”.

“Coma os sábados e domingos cobrábase un chisco máis, moitos operarios chegaron a levarlles agasallos, e sobre todo cocaína, para que os chamaran a traballar. Outros negámonos, e claro, non nos chamaban tanto”, manifesta este traballador sempre segundo a central nacionalista. .

Outra denuncia recorrente é, engade a CIG, a falta dos equipos de protección individual (EPI); “aínda que houbo casos en que a empresa si os entregou, mais logo esixiulles aos traballadores que llos pagaran unha vez finalizado o contrato”.

A CIG indica que nestas obras”concorren varios equipos, ademais dos galegos: hai grupos de españois, árabes de distintas nacións, bolivianos, filipinos, etc. O caso destes últimos é particularmente rechamante, indica o sindicato. "Ficháronos' en Filipinas ou ben nas obras do AVE da Meca, executado por un consorcio das principais construtoras españolas", coa promesa de traelos a a Europa para seguir traballando en obras ferroviarias. O prezo desa 'deferencia' é, prosegue a CIG, "a dispoñibilidade permanente para a empresa, as 24 horas, por 1300 euros ao mes, todo incluído”. 

“Dos sete operarios que máis horas extras ilegais desenvolveron nesta obra, seis son compañeiros filipinos; ningún deles desenvolveu menos de 1000 horas extras ilegais, chegando ás 13 horas diarias de traballo, durante semanas consecutivas”, explica Mario Maceiras, responsábel de Negociación Colectiva da FCM-CIG,.

Para o sindicato, nestas condicións "non é de estrañar" a sinistralidade nas obras.

comentarios