luns 06.07.2020

Cinco sentenzas xudiciais condenan Zara por despedimento improcedente e fraude na contratación na Coruña

UGT considera que as resolucións desmontan a “fraude na contratación” da empresa.

Concentración nun Zara de Compostela en maio deste ano.
Concentración nun Zara de Compostela en maio deste ano.

Cinco sentenzas xudiciais condenan Inditex por despedimento improcedente e fraude na contratación a raíz dunha denuncia do sindicato UXT na provincia da Coruña. A empresa ten agora que readmitir esas traballadoras ou ben indemnizalas por despedimento improcedente, segundo informa o propio sindicato socialista.

A orixe deste caso está na reclamación de que certos contratos eventuais, que a central reputa como "fraudulentos", se tornen en indefinidos. Unha situación que puxeron en coñecemento da propia empresa que, aseguran, “non quixo negociar”.

A mediados de 2017 denunciaron estas irregularidades perante Inspección de Traballo que, a inicios de 2018, insta a Zara a transformar 38 contratos eventuais en indefinidos. “A empresa, após o requeremento de Inspección, comezou a finalizar contratos que estaban en fraude para evitar transformalos en indefinidos”, explica UXT, que cualifica de “rastrera” esta actuación. O sindicato animou as traballadoras a denunciar.

Agora vén de se coñecer que a xustiza dálles a razón, “nas cinco sentenzas o xulgado ve unha clara fraude na contratación”, segundo o sindicato. UXT afirma que a través dos contratos fraudulentos, Inditex poder ter “traballadoras sen calendarios estábeis, e difeerentes aos do cadro do persoal indefinido, sen vacacións, menor salario…”.

comentarios