O sector bateeiro pide a dimisión da conselleira do Mar pola limitación da recollida de mexilla

Máis dun cento de bateeiros rodearon esta quinta feira as oficinas da Xunta da Galiza en San Caetano, en Santiago de Compostela, para protestar contra as delimitacións das zonas para recoller a mexilla (crías de mexillóns que proceden habitualmente das rochas costeiras) impostas pola Consellaría do Mar. Bateeiros arrodean a Xunta para protestar contra as restricións á mexilla Coches, furgonetas e incluso lanchas a bordo dun remolque volveron colapsar por sorpresa, do mesmo modo que aconteceu hai unha semana, as estradas da capital galega, e patrullas da Policía Local saíron a regular o tráfico en varias rúas. Fronte ao portal grande de San Caetano, participantes nesta protesta fixeron soar as bucinas e os megáfonos á vez que pediron a dimisión da conselleira do Mar, Rosa Quintana, á que se referiron de forma irónica como "percebeira", pois entenden que a titular de Mar defende os intereses das colectoras e colectores de percebe facéndoos prevalecer sobre os do seu colectivo. O presidente da Asociación de Mexilloeiros Illa de Arousa, José Manuel Oubiña, explicou durante a protesta que o que queren os bateeiros é "que lles deixen traballar" a mexilla, pois trátase da semente do "futuro mexillón". Segundo o sector bateeiro, 80% da mexilla procedía das zonas vetadas O representante do colectivo acusou a Consellaría de restrinxir "moitas zonas" nas que levaban "70 anos colectando mexilla e nunca houbo problemas" até que o ano pasado se fecharon. Segundo cálculos da asociación de mexilloeiros, da que forman parte propietarios dunhas 2.000 bateas, "80% da mexilla saía desas zonas" agora vetadas. Para compensar esta medida, a comezos de febreiro a Xunta decidiu abrir ao redor de 130 quilómetros de porto para a recolección do produto, mais Oubiña insiste en que "non valen para as bateas". "Como se nos abren 300 quilómetros", agregou. Ante este panorama, o presidente da Asociación de Mexilloeiros Illa de Arousa advertiu que está "moi en risco" a próxima campaña do mexillón "e os postos de traballo indirectos" que crea, cunha caída da produción que estimou entre 30 e 40%. "Non nos negamos a que pasemos puntos de control, que nos miren... O único que pedimos é que nos deixen traballar, non pedimos subvencións nin nada", engadiu o representante. Despois do Consello da Xunta da Galiza decorrido esta quinta feira, ante as preguntas da prensa, o presidente galego, Alfonso Rueda, afirmou: "Somos conscientes [no Executivo galego] de que hai un conflito e estamos actuando. Hai dous sectores en xogo e hai que tentar chegar a un acordo satisfactorio". "Proximamente procederase á apertura de novas zonas para cultivo de mexilla", concluíu. Continuarán as protestas O presidente da Asociación de Mexilloeiros Illa de Arousa, José Manuel Oubiña, adiantou esta quinta feira en declaracións a Nós Diario que esta sexta feira manterán unha reunión para estudar como proseguir co calendario de mobilizacións e as medidas de presión que exercer. Ademais, Oubiña amosouse satisfeito coas protestas desta quinta feira. "A asistencia foi masiva", dixo. As explicacións de Mar sobre a mexilla non convencen a oposición nin o sector O portavoz do sector sinalou a este xornal que o Executivo galego non se puxo en contacto coa asociación tras a mobilización, a pesar de que "representamos 2.000 das 3.300 bateas do país, máis de 60% do total da Galiza". Oubiña defende a forma de traballar dos mexilloeiros. "Non hai nin un só expediente aberto a bateeiros que colleran [mexilla] con percebe, e estamos inspeccionados durante todas as campañas da mexilla por gardacostas e polos gardas civís do mar", defende o voceiro da asociación. "Que nos deixen traballar como até agora, pois nunca houbera conflitos nin con percebeiros nin con ninguén", explica. "A Xunta sabe que neses 130 quilómetros famosos que abriron de portos non hai semente válida para aplicar nas bateas", incide. Sobre a alternativa dos criadeiros para a produción de semente, Oubiña entende que non é suficiente para cubrir a necesidade de mexilla por parte do sector. "É moi custoso", afirma. Alén diso, di, "non en todas as zonas das rías funcionan estes sistemas, os criadeiros poden ser algo complementario no futuro, mais non unha solución viábel na actualidade". Comparecencia de Antonio Basanta no Parlamento Esta mesma semana, o director xeral de Pesca e Acuicultura da Consellaría do Mar, Antonio Basanta, compareceu na comisión de Pesca do Parlamento galego. Basanta dixo que se aprobaron 15 medidas para favorecer a recollida da mexilla, entre elas a da apertura de 130 quilómetros adicionais de espazos portuarios e costeiros para coller esta cría, opción rexeitada esta quinta feira polo sector bateeiro en Compostela. Ao respecto, a responsábel de Pesca do BNG na Cámara, Rosana Pérez, afeou o director xeral que a Consellaría do Mar, entidade con competencias na materia, "lonxe de solucionar o problema, provocou enfrontamentos entre sectores do mar ao actuar unilateralmente". Unha cuestión que, segundo Pérez, "derivou na situación que estamos a vivir e na que a extracción de semente de mexillón en bancos naturais, actividade que durante décadas veu realizándose con normalidade, converteuse nunha auténtica peripecia”. Unha acusación na que afondou o parlamentario socialista Julio Torrado, que responsabilizou a Xunta de “crear un conflito a propósito” para despois tentar resolvelo. Non obstante, dixo, “fóiselle das mans, levándolles a ter unha mala conciencia pola cal queren aparentar que achegan solucións". A disputa entre bateeiros e percebeiros leva enquistada máis de tres anos O problema derivado da disputa entre o sector bateeiro e o percebeiro pola extracción dos recursos nas rochas do litoral leva enquistado desde que en novembro de 2019 foi aprobado un novo decreto para regular a recollida de mexilla, o que unido á escaseza do recurso provocou preocupación no sector, que desde aquel momento exixe solucións á conselleira do Mar, Rosa Quintana. O conflito entre mexilloeiros e percebeiros provén de 2019 Neste contexto, produciuse unha colisión de intereses entres os dous colectivos ao bater a extracción de mexilla co plan de explotación do percebe. Alén diso, mentres que o sector percebeiro alega que, ao contrario que o bateeiro, non pode recorrer a criadeiros, o colectivo mexilloeiro denuncia que os métodos extractivos do percebe prexudican as rochas e rematan coa semente que precisan. Produtores de mexillón critican ante o Parlamento o trato da Xunta ao sector O BNG e o PSdeG acusaron a Xunta durante este período de "alimentar" o conflito entre mexilloeiros e percebeiros polas zonas de recollida da mexilla e denunciaron a "incapacidade" da Consellaría do Mar de "propiciar un acordo". Unha crítica que provén, segundo os nacionalistas, de que o Executivo galego aprobara o decreto de novembro de 2019 de forma "unilateral". Pese á mobilización rexistrada esta quinta feira e da petición de dimisión da conselleira por parte do sector, o director xeral de Pesca e Acuicultura da Consellaría do Mar defende que "o diálogo cos representantes do sector é constante e que se está a traballar en múltiples eidos para atender as súas necesidades". En relación a isto, a oposición reclama ao Goberno galego retomar as xuntanzas entre mexilloeiros e percebeiros.