O salario medio por hora na Galiza é 10,9% máis baixo que o do conxunto do Estado español

Cada persoa asalariada da Galiza cobra 10,9% menos de media por hora traballada que a poboación do conxunto do Estado español. Así o corrobora o Estudo sobre salarios. Salarios desde a perspectiva do fogar publicado esta sexta feira polo Instituto Galego de Estatística (IGE). O sector industrial galego perdeu 47.500 empregos nos últimos 15 anos Desta forma, mentres que unha traballadora ou traballador por conta allea no país percibía en 2021 (último exercicio analizado polo IGE) unha retribución media de 19,7 euros por hora, este emolumento ascendía até os 22,1 euros no conxunto do Estado español. Unha diferenza que se fai moito maior na comparanza coa media dos Estados da Unión Europea (UE), xa que a nivel comunitario as persoas asalariadas percibían unha media de 25,4 euros por hora traballada. Así, as retribucións da Galiza eran en 2021 22,4% menores que na UE. Entre o ano 2000 e o ano 2021, a retribución media percibida polas persoas asalariadas da Galiza aumentou en 8,9 euros (82,4%), mentres a nivel estatal este incremento foi de 8,7 euros (64,9%). A pesar de partir dunha base moito máis baixa, xa que os salarios no ano 2000 no país eran 10,8 euros por hora mentres que no Estado ascendían a 13,4 euros, as retribucións por hora que perciben as persoas asalariadas na Galiza tan só recortaron 20 céntimos de diferenza no período estudado. Unha franxa de tempo na que os salarios medios por hora aumentaron en máis de 10 euros no conxunto da UE, incrementando a diferenza coas retribucións medias por hora da Galiza e do Estado español e pasando dos 15,1 euros no ano 2000 aos 25,4 euros en 2021, o que se traduce nunha alza de 68,2%. Por outra parte, o peso das retribucións percibidas polas persoas asalariadas galegas sobre o Produto Interior Bruto (PIB) do país foi menor que o mesmo índice no Estado español e na UE. Desta maneira, mentres que o factor traballo supuxo no ano 2021 unha porcentaxe de 46,2% sobre o PIB da Galiza, esta taxa elevouse a 48,5% a nivel estatal e a 47,7% a nivel comunitario. A remuneración das persoas asalariadas é un compoñente do PIB cando se analiza pola vía das rendas. A porcentaxe do seu peso relativo trátase dun índice moi relevante para analizar a importancia relativa dos salarios no conxunto dunha economía, pois indica que parte do valor engadido bruto xerado por un territorio vai destinada a remunerar o factor traballo, sendo na Galiza menor a taxa que vai parar ás persoas asalariadas con respecto ao Estado e á UE. Taxa de ocupación A taxa de ocupación da poboación (a relación entre o número de persoas que teñen un emprego remunerado ou exercen unha actividade independente comprendidas no rango de idade desde os 16 anos até os 64 anos e a poboación total que comprende o mesmo rango de idade) na Galiza foi de 64,3% en 2021, moi similar á media estatal (63,8%). O sector servizos aglutina sete de cada dez parados A autonomía do Estado español (excluíndo as cidades autónomas) cun índice máis alto de persoas ocupadas foi a Comunidade de Madrid (70%), mentres que a taxa máis baixa correspondeu coas Illas Canarias (54,6%). Na comparanza coa UE, a taxa de ocupación na Galiza situouse 4,1 puntos porcentuais por debaixo da media comunitaria (68,4%). Os Países Baixos (80,1%) foron o Estado con maior taxa de ocupación e a menor foi a de Grecia (57,2%). En 2021 a Galiza situouse no posto 14 da lista de autonomías con menor taxa de paro No ano 2021 a Galiza situouse no posto 14 da lista de autonomías con menor taxa de paro da poboación de 16 a 64 anos (11,7%), situándose 3,2 puntos porcentuais por debaixo da media estatal (14,9%). Euskadi (9,9%) obtivo o dato máis baixo, mentres que as Illas Canarias (26,9%) experimentaron a taxa máis alta. Na Galiza a taxa de paro situouse 4,6 puntos porcentuais por baixo da comunitaria. O Estado español (14,9%) situouse xunto con Grecia no primeiro posto da lista de desemprego na UE en 2021, mentres que o menor índice de paro foi o da República Checa (2,9%). O dato do desemprego na Galiza vese influenciado pola taxa de actividade (a relación entre o número de persoas que traballan ou buscan activamente un emprego e a poboación en idade de traballar), que ascendeu en 2021 a 72,9%, mentres que no Estado español foi de 75%. A autonomía con maior índice de actividade foi Madrid (79,2%), mentres que o menor deuse en Asturies (71%). Con respecto á UE, a taxa de actividade da Galiza foi 2,6 puntos porcentuais menor. Os Países Baixos (83,7%) foron o Estado cunha maior taxa de actividade, mentres que a máis baixa foi a de Italia (64,5%). A temporalidade foi 10,5 puntos porcentuais maior na Galiza que na UE Por outra parte, na Galiza no ano 2021 a porcentaxe de poboación asalariada con contrato temporal sobre o total de poboación asalariada (taxa de temporalidade) foi de 24,5%, moi parecida á media estatal (25,1%). A autonomía con maior taxa de temporalidade foi Andalucía (34,6%), mentres que o índice máis baixo correspondeu coa Comunidade de Madrid (19,2%). Con respecto á UE, o índice de temporalidade da Galiza foi 10,5 puntos porcentuais maior. Os Países Baixos (27,4%) foron o Estado cun maior índice de temporalidade, mentres que o máis baixo foi o de Estonia (1,7%). A Galiza precisa recorrer ao traballo por conta propia A porcentaxe de poboación asalariada sobre o total de poboación ocupada ten como resultado a taxa de salarización, que representa o peso do traballo por conta allea no emprego total dun territorio, e neste sentido, a capacidade dunha economía para xerar emprego a través das súas empresas. A Galiza perdeu no mes de xaneiro máis de 40 autónomos por xornada Canto menores son os postos de emprego ofrecidos por parte das compañías dun territorio, maior é a necesidade da poboación de recorrer ao traballo por conta propia. A este respecto, a taxa de salarización da Galiza no ano 2021, de 80,8%, foi 3,3 puntos porcentuais menor que a do conxunto do Estado español (84,1%) e 4,7 puntos porcentuais que a da media da UE (85,5%). Dinamarca e Alemaña foron os Estados coa maior taxa de salarización (91,2%) e Grecia obtivo a menor (68,2%). Taxa de parcialidade A porcentaxe de poboación asalariada con xornada parcial sobre o total de poboación asalariada (taxa de parcialidade) no ano 2021 na Galiza (14,6%) foi similar á do conxunto do Estado español (14,7%) e 4,3 puntos porcentuais menor que a da media da Unión Europea. Os Países Baixos (45,6%) foron o Estado membro da UE coa maior taxa de parcialidade e a menor deuse en Romanía (0,4%).