A reforma das pensións protagoniza os actos polo Día da Clase Obreira Galega

Con motivo do 10 de Marzo, Día da Clase Obreira Galega, na tarde desta sexta feira tiveron lugar mobilizacións da CIG nas sete cidades galegas, así como en Vilagarcía, Viveiro e A Estrada, baixo o lema "As pensións non se tocan. Emprego, salarios e servizos públicos". Ademais, previamente, pola mañá, tivo lugar unha ofrenda floral da central sindical nacionalista en Ferrol en conmemoración dos sucesos acontecidos na cidade durante a loita obreira de 1972, que se saldou co asasinato de Amador Rei e Daniel Niebla. Pola súa parte, CCOO tamén realizou a súa propia homenaxe aos traballadores abatidos pola policía franquista, neste caso cun acto na rúa 10 de Marzo de Vigo. Precisamente, na xornada desta sexta feira, o Ministerio español de Inclusión, Seguridade Social e Migracións propuxo cambios no período de cómputo das pensións por xubilación para que estas se calculen ou cos últimos 25 anos cotizados ou ben con 29 anos de cotización, dos que se poderían excluír os dous peores, polo que na práctica o cómputo neste segundo caso sería de 27 anos. Reforma das pensións: Escrivá propón elixir entre un cómputo de 25 anos e outro de 29 Ao respecto, o secretario xeral da CIG, Paulo Carril, que participou na ofrenda e na manifestación da CIG en Ferrol, apuntou que, (a falta de coñecer en detalle a proposta do Goberno español) "malia o envoltorio co que nos anuncian este acordo é evidente que hai unha ampliación do período de cálculo. As dúas opcións das que se fala, 25 anos ou 29 con posibilidade de descartar dous anos, perseguen o obxectivo das anteriores reformas, recortar as contías das pensións". "Porque aprobar novas reformas mantendo a de 2011 fai medrar a caída progresiva da contía das pensións que vimos padecendo nos últimos anos por causa da ampliación da idade de xubilación dos 65 aos 67 anos e do aumento do período de cálculo dos 15 aos 25 anos. Unha caída das pensións xeneralizada que no caso das mulleres afondaría aínda máis a fenda de xénero [nas pensións por xubilación], que na Galiza supera xa a taxa de 34%", acrecentou Carril. Bruxelas intensifica a presión para que o Estado español reforme as pensións As organizacións sindicais CCOO e UXT realizaron unha valoración xeral positiva sobre a segunda fase da reforma de pensións. O secretario xeral de CCOO, Unai Sordo, argumentou que "é un gran paso e un cambio radical" sobre "a perspectiva de cal é o problema das pensións". Pola súa parte, o secretario xeral de UXT, Pepe Álvarez, afirmou sobre a proposta do Goberno español que é "extraordinariamente positiva", e engadiu sobre a medida concreta de ampliar os anos para o cálculo da pensión que "mellor, imposíbel". Ademais, a patronal española, representada pola CEOE, Cepyme e ATA, expresou a súa "frontal oposición" á reforma das pensións exposta polo Executivo estatal, ao que acusaron de ter unha "voracidade recadadora" e de presentar unha proposta "populista", que "socavará o esforzo das empresas nas negociacións salariais" cos sindicatos. Pensións mínimas O réxime dual do período de cómputo estaría vixente, segundo a proposta anunciada polo ministro español José Luis Escrivá, durante os próximos 20 anos. A nova opción de cómputo que se introduce (29 anos excluíndo dous) despregarase de forma progresiva durante 12 anos a partir de 2026. A pensión media na Galiza sobe 10% en febreiro mais é 173 euros menos que a media estatal A reforma, que conta co aval de Bruxelas e co acordo entre as dúas forzas do Executivo do Estado español [o PSOE e Unidas Podemos], inclúe unha "cota de solidariedade" para a parte do salario que actualmente non cotiza por superar o tope máximo de cotización. Esta será de 1% en 2025 e irá aumentando a un ritmo de 0,25 puntos porcentuais por ano até chegar a 6% en 2045. O texto do Goberno español adhire tamén unha mellora das pensións mínimas, consistente en estabelecer unha senda de converxencia das pensións mínimas contributivas para asegurar que alcancen 60% da renda media, tomando como referencia a evolución da pensión mínima con cónxuxe a cargo, que alcanzaría entre 2024 e 2027 a taxa de 60% da renda media correspondente a un fogar de dous adultos. Para as pensións non contributivas estabelécese un proceso similar, crecerán até converxer en 2027 con 75% do limiar da pobreza calculado para un fogar dunha soa persoa. Con esta proposta de reforma das pensións, dixo o presidente español, Pedro Sánchez, "damos seguridade aos nosos maiores e ás súas xubilacións presentes e futuras e garantimos a sostibilidade do noso sistema público para as próximas décadas". Da outra parte da coalición, o portavoz de Unidas Podemos no Congreso, Pablo Echenique, sostivo que a reforma "garante a sostibilidade do sistema" e engadiu que supón unha das medidas "máis redistributivas" da lexislatura. O soldo de 42% das asalariadas galegas é igual ou menor á contía do salario mínimo O vicesecretario de Economía do PP, Juan Bravo, criticou a reforma das pensións xa que, na súa opinión, "propón un incremento das cotizacións", unha decisión que cualificou como "un imposto máis ao traballo". O portavoz do BNG no Congreso, Néstor Rego, afirmou que "a pesar de que parece menos lesiva do primeiramente anunciado, supón unha consolidación cando non un agravamento da anterior reforma de 2011 e abre a vía de no futuro eliminar o réxime dual e consolidar o aumento a 29 anos". CCOO conmemorou o 10 de marzo CCOO rendeu esta sexta feira homenaxe á "loita obreira" de marzo de 1972 cunha ofrenda na rúa 10 de Marzo de Vigo e coa intervención de varios responsábeis sindicais que lembraron os episodios acontecidos en Ferrol co asasinato de Amador Rei e Daniel Niebla. A secretaria comarcal do sindicato en Vigo, Montse Carrera, subliñou que este acto debe servir para "reivindicar unha loita obreira moi grande", especialmente a traxedia de Ferrol, polo que supuxo de mobilización e concienciación posterior. Esta efeméride "non está suficientemente recoñecida" pola sociedade galega e "hai que darlle máis presenza" lembrando os "compañeiros" que, "enfrontándose a unha ditadura, en plena opresión" mantiveron "a democracia, as liberdades e os dereitos", engadiu Carrera.