Varanda Viva denuncia "graves incumprimentos" pola falta de protección do persoal de ambulancias do 061

A rede galega de solidariedade, voluntariado e reivindicación Varanda Viva enviou esta mañá unha denuncia e un escrito dirixidos á Consellaría de Sanidade e á Valeduría do Pobo para reclamar medidas necesarias de protección para as traballadoras e traballadores das ambulancias, ante os avisos de "graves incumprimentos" na dotación de material ao persoal recibidos pola organización.
2020032617212917576
photo_camera A rede Varanda Viva pide maiores medidas de protección para o persoal do 061.

Nas súas comunicacións, Varanda Viva recolle as denuncias do persoal do 061 por ter que traballar con unidades nas que tan só hai un TES (Técnico de Emerxencias Sanitarias), e que en atención aos protocolos estabelecidos teñen que usar até tres EPI a fin de cumprir coas garantías de seguridade fixadas. No entanto, sinalan que non se están a dotar de suficientes equipos de protección individual (luvas, máscaras, batas, etc) aos equipos profesionais das ambulancias, "o que o expón a riscos de contaxio". Segundo alertan, nalgúns casos mesmo se están a reutilizar as máscaras, a meirande parte adquiridas a través de doazóns.

Como tamén indica o persoal, "nin lle están facendo as probas para detectar a COVID-19 nin limpando os centros de traballo".

"Ante estes graves incumprimentos, o persoal sanitario atópase desprotexido, o que pode convertelo en persoal de posíbel contaxio e en vector de transmisión para si mesmo e para as persoas doentes, o que dificulta o control da pandemia", alertan.

A plataforma traslada tamén as queixas do persoal do 061 advirten por estar traballando "coas mesmas unidades que antes do comezo da crise sanitaria, tendo unha maior carga de traballo e menos tempo para acudir ás emerxencias, pois deben poñerse os equipos antes de cada saída".

"Reclamámoslle á Consellaría de Sanidade que poña en marcha todos os mecanismos necesarios para dotar de material suficiente ao persoal traballador de forma inmediata a fin de que o persoal sanitario poida desenvolver as súas funcións con todas as garantías", reclaman desde Varanda Viva. 

Comentarios