Pontón pide unha investigación polo accidente do hidroavión no que morreu un piloto en Lobios

A portavoz nacional do BNG, Ana Pontón, manifestou o seu sentido pesar e pediu este sábado unha investigación sobre as causas do accidente dun hidroavión que traballaba para apagar un incendio declarado en Lobios.
Ana Pontón no acto do BNG [Arxina].
photo_camera Ana Pontón no acto do BNG [Arxina].

A portavoz nacional do BNG, Ana Pontón, pediu este sábado unha investigación sobre as causas do accidente dun hidroavión que traballaba para apagar un incendio declarado en Lobios, na comarca d Ourense, que provocou a morte dun dos pilotos e feridas graves ao outro.

A través de varias mensaxes na súa conta de Twitter, Pontón afirmou que este sábado "é un día de loito para Galiza" e manifestou o seu "sentido pesar" e o da formación que lidera á familia e amizades do falecido, así como "a todo o persoal de extinción".

 

Ademais, enviou os seus "mellores desexos" para o tripulante ferido e "moita forza ás persoas que cada día poñen en risco as súas vidas" para salvagardar a seguridade dos demais.

As persoas que cada verán loitan contra os incendios "fan un labor esencial", que a líder do BNG pediu "valorar e recoñecer". Investigar o sucedido é "o mínimo exixíbel nun sistema democrático", engadiu.

"Todo o meu agarimo para as familias das vítimas", publicou Sánchez

Pola súa banda, o presidente do Goberno español, Pedro Sánchez, tamén trasladou á familia do traballador falecido o seu sentido pésame a través da súa conta de Twitter. 

"Todo o meu agarimo para as familias das vítimas e o recoñecemento de todo o Goberno aos equipos que loitan contra os incendios forestais", publicou Sánchez na súa conta de Twitter.

Así mesmo, o presidente do Executivo destacou que está atento ás informacións sobre o accidente do hidroavión portugués que traballaba na extinción do incendio de Lobios.

No sinistro, faleceu un dos dous tripulantes, de orixe portuguesa, do hidroavión sinistrado e o outro piloto español sofre varios politraumatismos, polo que foi evacuado a un hospital de Portugal nun helicóptero, segundo informou a Consellería do Medio Rural, cuxo responsable, José González, desprazouse ao lugar.

Ademais, tamén trasladou as súas condolencias a ministra para a Transición Ecolóxica e Reto Demogrático, Teresa Ribeira. "Noticias moi tristes nuns días moi duros para quen loitan contra o lume. A cooperación dos dous servizos convértenos nun só equipo, neste momento sobrecogido -de novo- pola dor", sinala a ministra a través do seu perfil de Twitter, no que traslada un abrazo para "todos", especialmente para os "compañeiros lusos".

Comentarios