O Comité Intercentros da CRTVG desconvocou onte o chamamento á folga previsto nos medios públicos da Galiza para o vindeiro domingo, 28 de maio. A decisión deuna a coñecer unha vez tivo acceso aos "inauditos servizos mínimos impostos pola empresa, tan abusivos e desproporcionados que impiden na práctica o exercicio do dereito á folga".
A representación dos traballadores fixara o 28-M, data dos comicios municipais, o sexto dunha serie de paros que o persoal da Televisión da Galiza e da Radio Galega iniciou no mes de marzo baixo o lema 'Non máis abusos'.
"O número de efectivos convocados para traballar na xornada electoral en servizos mínimos supera o de calquera outra cita anterior coas urnas", unha decisión, unha decisión "inxustificada" din, que máis que "garantir o deber que ten a CRTVG como servizo público" durante o desenvolvemento dunhas eleccións, o que busca é "rebentar a folga".
O Intercentros tacha de "despótico e fascista" o comportamento da dirección da corporación, polo que atacará xudicialmente unha decisión que "inhabilita na práctica o exercicio dun dereito fundamental". Ademais, avanzou a convocatoria de asembleas xerais o vindeiro 1 de xuño para decidir cales serán os próximos pasos a seguir.
Nin manipulación nin represalias
A situación de manipulación informativa e as represalias contra traballadores e traballadoras do ente público por parte das direccións dos distintos medios intensificaron no primeiro trimestre do ano as mobilizacións e protestas que o movemento Defende a Galega iniciou hai agora e anos e que esta sexta feira asina o seu Venres Negro 262.
Segundo a representación legal do persoal, a dirección dos medios públicos agrava así aínda máis a política de abusos que precisamente se estaba a denunciar con estas mobilizacións que comezaron o pasado 6 de marzo, cando tivo lugar o primeiro paro, ao que seguiron as folgas dos días 24 e 25 dese mes e o paro do 25 de abril, que contaron cun gran seguimento por parte do cadro de persoal.
O pasado día 11 de maio tiña lugar a quinta xornada de folga do persoal do ente público que afectou de forma notábel a programación da TVG, concretamente a programas como A Revista, Atmosféricos, os Deportes ou o Diario Cultural, entre outros. O seguimento, segundo os datos oficiais achegados pola corporación de medios públicos da Galiza, foi de 26,1%.
A dirección da CRTVG, pola súa parte, afirmou que o seguimento, na quenda de mañá, tanto en San Marcos (Santiago de Compostela) como nas delegacións, foi de un cuarto do cadro de persoal total (26,1%). "O que supón que máis de 73% do persoal non secundou a folga", indicaban.
Protesta contra Sánchez Izquierdo
Persoal da CRTVG levou a cabo esta cuarta feira unha nova protesta nas inmediacións do Parlamento galego que, nesta ocasión, coincidiu coa chegada do director xeral do ente público, Alfonso Sanchez Izquierdo. Entre as consignas que se ouviron na protesta estaban 'Non á manipulación' ou 'Sánchez Izquierdo dimisión'.
