O desemprego sobe na Galiza en 3.700 persoas

A nivel estatal, o paro subiu en 103.800 persoas entre xaneiro e marzo, o que supón 3,4% máis que no trimestre anterior, mentres que a ocupación reduciuse en 11.100 postos de traballo (-0,05%), o seu menor descenso nun primeiro trimestre desde 2007, sempre segundo datos do INE.
Traballo de soldadura eléctrica nun taller. (Foto: Nós Diario).
photo_camera Traballo de soldadura eléctrica nun taller. (Foto: Nós Diario).

O paro subiu en 3.700 persoas entre xaneiro e marzo na Galiza, o que supón 2,8% máis que no trimestre anterior, mentres que a ocupación reduciuse en 800 postos de traballo (-0,08%), segundo a Enquisa de Poboación Activa (EPA) publicada esta quinta feira polo Instituto Nacional de Estatística (INE).

Desta maneira, o número de desempregados incrementouse no país por baixo da media estatal, xa que o incremento no total do Estado foi de 3,4%, con 103.800 parados máis. O mesmo sucede coa caída do número de ocupados, que a nivel estatal foi de -0,05%, con 11.000 postos de traballo menos.

Así, o número de parados na Galiza quedou nas 135.100 persoas, 6.000 menos que hai un ano (-4,24%). Ademais, o número de ocupados é de 1,1 millóns de persoas, unhas 12.300 persoas máis que no mesmo trimestre de 2022 (+1,13%).

Con estas cifras, a taxa de paro no país situouse en 10,9%, por baixo da media estatal, onde se posicionou en 13,26%.

Con todo, a taxa de paro mantense inferior entre os homes, con 10,07%, mentres que as mulleres teñen unha taxa de 11,78%. A taxa de actividade na Galiza é de 52,8%, por baixo do 58,5% a nivel Estado.

Datos estatais

A nivel estatal, o paro subiu en 103.800 persoas entre xaneiro e marzo, o que supón 3,4% máis que no trimestre anterior, mentres que a ocupación reduciuse en 11.100 postos de traballo (-0,05%), o seu menor descenso nun primeiro trimestre desde 2007, sempre segundo datos do INE.

Ao finalizar marzo, o número total de parados situouse en 3.127.800 persoas e o de ocupados, en 20.452.800 persoas. O aumento do paro no primeiro trimestre deste ano é o máis elevado nun primeiro trimestre desde 2020, cando a irrupción da pandemia levou a un repunte do desemprego de 121.000 persoas. No primeiro trimestre do ano pasado, o paro subiu en 70.900 persoas, menos do que o fixo en 2023.

A taxa de paro repuntou case catro décimas no primeiro trimestre, ate 13,26%, o seu valor máis alto desde o primeiro trimestre de 2022. Pola súa parte, a taxa de actividade mantívose estábel no 58,55%, tras aumentar o número de activos en 92.700 persoas entre xaneiro e marzo (+0,4%).

No último ano o paro reduciuse en 47.000 persoas (-1,5%) e creáronse 368.000 empregos (+1,8%), mentres que o volume de activos incrementouse en 321.100 persoas (+1,4%).

Segundo o INE, o número de asalariados reduciuse no primeiro trimestre en 23.200 persoas (-0,1%), concentrándose todo o axuste no emprego temporal (-117.000), xa que os asalariados con contrato indefinido aumentaron entre xaneiro e marzo en 93.800 (+0,66%), até superar os 14,35 millóns. Deste modo, a taxa de temporalidade retrocedeu seis décimas, até 17,28%.

Comentarios