Os servizos de emprego publicaron esta terza feira (4 de novembro) os dados correspondentes ao paro rexistrado no mes de outubro. Galiza rematou o pasado mes con 5.841 persoas máis dadas de alta como demandantes de emprego. Isto é, un 2,45% máis que o mes anterior. En termos anuais o desemprego reduciuse un 9,02%.
Por sectores, os servizos continúan á cabeza no número de parad@s con 151.598 persoas seguido da industria que suma 170 nov@s desempregad@s (32.795 persoas). A construción deixa 31.210 persoas sen traballo e a agricultura 8.457. Por idades, @s menores de 25 anos cífranse en 13.524 persoas, o que supón o 5,54% do total.
A temporalidade continúa a ser a norma nas contratacións, dos 78.171 novos contratos máis de 71.500 son temporais
![Publicidade 195691]()
Neste mes de outubro o número de demandantes de emprego que non tiñan un traballo anterior sitúase en 19.984 persoas --612 menos que en setembro. Fundamentalmente procedentes de segmentos de idade entre os 16 e 30 anos (7.878).
O incremento do número de desempregad@s débese en boa medida ao fin da estacionalidade. Aínda así este mes déronse de alta á Seguridade Social 78.171 persoas, maioritariamente con contratos en réxime temporal (71 mil 588) mentres que os contratos indefinidos supoñen 6 mil 583.
No conxunto do Estado español a tendencia é a mesma que en Galiza. O número de persoas desempregadas rexistradas nos servizos de emprego aumentou en 79 mil 154 no mes de outubro o que volve pór o paro rexistrado por riba dos 4 millóns e medio (4.526.804).
