José Antonio Gómez, secretario xeral da UXT na Galiza

"Non chegando a todos os obxectivos, a reforma recupera dereitos"

Jose Antonio Gómez (UXT) analiza para Nós Diario o acordo da reforma laboral que chega agora á Cámara Baixa para a súa aprobación definitiva. O sindicato que dirixe na Galiza foi, xunto con CCOO, o que apoiou o texto xunto á patronal e o Goberno español. 
José Antonio Gómez, secretario xeral de UXT na Galiza.
photo_camera José Antonio Gómez, secretario xeral de UXT na Galiza.

—UXT, xunto con CCOO, o Goberno español e a patronal, vén de alcanzar un acordo para modificar o marco normativo en materia laboral. Que aspecto destacaría desta reforma?

O principal é que a reforma laboral recupera dereitos e que para nós sen dúbida ten valor porque se dá con consenso. Hai que ter en conta que, das últimas reformas que se fixeron, só esta e a de 2006 foron con consenso.

Para a Galiza e para o conxunto do Estado, a recuperación da prevalencia do convenio de sector sobre o de empresa é fundamental. Realmente iso foi o que provocou o deterioro das relacións laborais e unha tremenda desvalorización salarial. Xunto a isto, a recuperación da ultraactividade dos convenios colectivos, é dicir, que estes non venzan e queden ao pairo os dereitos dos traballadores e das traballadoras, é igualmente fundamental.

Cremos tamén firmemente que con esta reforma vaise impulsar a loita contra a temporalidade, na que estamos inmersos. Co reforzo da contratación indefinida vaise avanzar na estabilidade do emprego. 

—Mais estamos a falar dunha reforma, e non dunha derrogación, como exixían inicialmente.

 Sen dúbida é un acordo que non cumpre todos os obxectivos que nós tíñamos marcados, pero é un acordo que se enmarca dentro do consenso. Imos ter que seguir loitando e falando, porque quedaron cousas no tinteiro, iso non se lle escapa a ninguén.

—Que sectores se verán máis beneficiados polo novo texto?

Fundamentalmente o sector servizos. Quizais un dos logros máis importantes é que na externalización de servizos que se produce nas empresas, a partir de agora quedará baixo o convenio de referencia de sector da actividade principal. 

Unha firma que traballa noutra empresa cun servizo estabilizado, até o de agora e coa reforma laboral do PP, o que se lle implantaba era un convenio de empresa ao persoal, loxicamente cunhas condicións moito máis desvalorizadas. A partir de agora estarán amparadas polo convenio de referencia da actividade que desenvolven, con independencia do obxectivo social e forma xurídica da empresa, o que supón un importante golpe a fenómenos precarizadores como o das empresas multiservizos. 

—Cales son esas cuestións que quedaron no tinteiro?

Temos que seguir traballando por mellorar a indemnización por despedimento ou o control administrativo dos expedientes de regulación de emprego, os salarios de tramitación e algunhas cousas máis. Sabemos que isto é difícil, pero loxicamente hai que pór en valor o contexto político de crispación total no que estamos actualmente. Non chegando a todos os obxectivos, a reforma recupera dereitos. 

Creo que fixemos un acordo en boa fe, en sintonía e que entendemos que agora debería validarse no Congreso dos Deputados porque se alguén ten que dicir algo nas relacións laborais somos as organizacións sindicais e os empresarios. 

—Son optimistas á hora de avanzar nos temas pendentes?

Vai ser moi difícil consensualo e acordalo coa patronal, porque realmente se negan totalmente a falar disto, pero nós imos seguir intentándoo. Son cuestións que estamos convencidos de que imos ter que abordar co Executivo e seguramente de maneira inmediata sexa difícil. Queda camiño por avanzar e nós imos seguir loitando por dar novos pasos, porque é o noso papel e a nosa obriga.

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios