Navantia quer que se declare ilegal a greve das auxiliares para evitar “sobreusos deste dereito”

O xulgado do social nº2 de Ferril deixou visto para sentenza a vista pola demanda da empresa contra a CIG polo paro de 22 días en outubro pasado na industria auxiliar  para reivindicar o cumprimento dos acordos salariais e laborais de 2001.

CIG navantia greve

O Xulgado de Ferrol deixou visto para sentenza o xuízo pola demanda presentada por Navantia contra a CIG e o comité da greve que en outono pasado afectou a industria auxiliar durante 22 días. Ás portas do Xulgado concentráronse delegados e delegadas da central nacionalista, para “reivindicar que o dereito á folga é un dereito fundamental e que Navantia, por moi poderosa que sexa, nin nos vai asustar nin vai impedir con demostracións deste tipo que defendamos ese dereito”, en palabras de Paulo Carril, secretario xeral do sindicato.

Para os abogados da empresa, con esta greve o que se pretendía era paralizar a factoría e que así ese paro afectase tamén aos operarios do estaleiro público. Piden que se declare esta greve ilegal para, afirman, evitar así que no futuro se dea un “sobreuso deste dereito”.

A CIG defendeu que “a greve non é un delito, é un dereito da clase traballadora”. Para o sindicato, con esta denuncia Navantia procura que as traballadoras e traballadores “vítimas da explotación aparezamos como denunciados por facer valer os nosos dereitos".

Para a CIG os intentos de Navantia por declarar a greve das auxiliares como ilegal ou abusiva teñen como obxectivo criminalizar a loita dos operarios das subcontratas, que en outubro do pasado ano secundaron masivamente durante 22 días unha greve para reivindicar o cumprimento dos acordos salariais e laborais de 2001, a súa inclusión nun marco legal que lle dea eficacia, e rematar coa precariedade laboral instalada neste sector.

Comentarios