O número de parados rexistrados nas oficinas dos servizos públicos de emprego subiu en 2.826 persoas en xaneiro na Galiza, o que representa 1,99% máis que no mes anterior, até contabilizar 145.048 desempregados. Así se desprende dos datos publicados esta quinta feira polo Ministerio de Traballo e Economía Social, que informa tamén de que nos últimos doce meses o paro baixou no país en 8.884 persoas, 5,77% en relación ao primeiro mes de 2022.
Por provincias, todas elas anotaron un incremento do paro o mes pasado, con Pontevedra á cabeza, onde medrou 2,15% en relación a decembro, con 1.184 desempregados máis. A Coruña contabilizou 1.181 parados máis (+2,07%), namentres Ourense fechou xaneiro con 284 persoas máis anotadas ás listas do antigo Inem, 1,74% máis, e Lugo incrementou este número en 1,30%, con 177 desempregados máis que hai un mes.
Por sexos, o 58,3% das persoas paradas son mulleres. Entre outros datos, 5.671 desempregados e desempregadas tiñan menos de 25 anos. Aliás, 71,3% dos parados galegos corresponde ao sector servizos, con 103.423 persoas, mentres que 3,3% pertence ao mundo da agricultura (4.809 persoas).
Un 10,3% era da industria (15.051 persoas) e á construción pertencían case o 7%, con 10.147 persoas. Ademais, 11.618 persoas desempregadas na Galiza non tivera un emprego antes. Destas cifras despréndese que todos os sectores reduciron o seu número de parados agás o dos servizos, onde aumentaron en 3.100 persoas tras o fin da campaña do Nadal.
En concreto, o paro na agricultura galega baixou en 9 persoas en xaneiro, mentres que na industria esta caída foi de 56 persoas e de 119 desempregados menos na construción. Tamén 90 persoas que non tiveran un emprego antes atopárono en xaneiro.
Datos estatais
A nivel estatal, o número de parados rexistrados nas oficinas dos servizos públicos de emprego subiu en 70.744 persoas en xaneiro en relación ao mes anterior (+2,5%) tras o fin da campaña de Nadal, segundo os mesmos datos do Ministerio. A suba de xaneiro deste ano é catro veces superior á experimentada no mesmo mes de 2022, cando o desemprego aumentou en 17.173 persoas, mais fica por baixo das rexistradas en 2021 (+76.216 parados), 2020 (+90.248) e 2019 (+83.464) e do incremento medio dos meses de xaneiro (+81.424 parados).
Após a repunta de xaneiro, impulsado sobre todo polo sector servizos, o número total de desempregados volveu superar a cifra de 2,9 millóns de parados, o que non sucedía desde o pasado mes de outubro. En concreto, o primeiro mes do ano fechou con 2.908.397 desempregados, "a menor cifra nun mes de xaneiro desde 2008", destacou Traballo.
Xaneiro é un mes no que sempre aumenta o desemprego pola finalización dos contratos asociados ás festas de Nadal. Así, desde o inicio da serie histórica comparábel en 1997, o paro nunca baixou nun mes de xaneiro. A maior repunta neste mes, de case 200.000 desempregados, rexistrouse en 2008, mentres que o menor foi o de 1998, cando se sumaron ás listas do desemprego 10.285 persoas.
En termos desestacionalizados, o paro rexistrado diminuíu no primeiro mes de 2023 en 12.462 persoas. No último ano o desemprego acumula un descenso de 241.681 parados, o que supón 6,9% menos, cun retroceso do paro feminino de 101.378 mulleres (-5,5%) e unha caída do desemprego masculino de 113.303 homes (-8,8%).
