A partir desta quinta feira, día 12, o persoal de Leche Celta iniciará unha greve indefinida. É o paso acordado en asemblea polos traballadores e traballadoras da factoría de Meira perante o inmobilismo da empresa após case un mes de mobilizacións para demandar melloras laborais e salariais. Unhas melloras das que xa goza o persoal doutras factorías do grupo, como Pontedeume, Ávila e Santander. Até o inicio da greve indefinida o persoal desenvolverá paros rotativos de catro horas por quenda de traballo.
O secretario comarcal da FGAMT-CIG de Lugo, Christian López, informou que, dende esta segunda feira, na factoría non está a transformar "nin un só litro de leite", derivando a empresa toda a súa recollida cara a outras industrias ou aos seus propios centros. Unha decisión que para o comité resulta sorprendente polas posíbeis consecuencias no mantemento do seu único cliente, Mercadona. O persoal considera esta actitude de non negociar como unha "completa irresponsabilidade" por parte de Leche Celta.
O conflito que arrancou en marzo ten as súas raíces máis atrás, hai dous anos. O persoal da factoría de Meira, explica Christian López, ve como nos outros tres centros de Leche Celta vanse dando melloras que non chegan ao centro deste concello lucense. Os traballadores e traballadoras de Meira pelexan por mellorar as retribucións ou por regularizar a xornada no tocante ás fins de semana. Loitan por mellorar as condicións laborais e salariais contra o muro da empresa, “mentres en 2017 o persoal de dirección aumentou o salario en 9%”.
