Un home faleceu na mañá desta sexta feira despois de quedar atrapado baixo o camión que manexaba no interior dunha nave do Polígono das Gándaras, no municipio do Porriño. Segundo informou o 112 Galiza, o sinistro mortal produciuse minutos antes das 9,00 horas desta sexta tal e como indicaron as persoas que contactaron co servizo de emerxencias para pedir axuda urxente.
Deste xeito, por parte do Centro Integrado de Atención ás Emerxencias pediuse a colaboración dos Bombeiros do Baixo Miño para liberar á vítima, atrapada baixo o camión cargado con material pesado. Ademais dos bombeiros, avisouse a Urxencias Sanitarias de Galicia-061, así como á Guardia Civil, que investiga os detalles do sucedido. En concreto, sinalaron a Europa Press fontes sanitarias, o 061 enviou ao lugar unha ambulancia de soporte vital avanzado cuxo persoal sanitario confirmou o falecemento no lugar do home, J.G.M., de 57 anos.
O fatal suceso prodúcese menos de 24 horas despois de que esta quinta morrese no Pino un operario ao caer do tellado dunha granxa. O pasado día 15 un traballador morría en Coirós cando manipulaba cables de media tensión. Días antes, perdía a vida un mariñeiro ao embarrancar un cerqueiro perto de Baroña.
Galiza segue a liderar a mortalidade en sinistralidade laboral. Segundo datos recompilados pola CIG‑Saúde Laboral, neste primeiro semestre de 2019 a suma de accidentes laborais en xornada de traballo (13.878) e in itínere (1.410) que tiveron traballadoras e traballadores na Galiza foi de 15.282, dos cales 14.993 foron leves, 266 graves e 29 mortais (24 en xornada laboral e 5 in itínere). Ademais, duplicamos a media estatal no índice de incidencia dos accidentes mortais: é de 6,05 por 3,24 de media no Estado.
