A representación sindical da CIG nos astaleiros de Navantia en Ferrolterra veñen de demandar á Xunta que traballe na garantía de carga de traballo para as factorías blindando a obra do 'Evrima' para que decorra nas infraestruturas situadas na ría.
A sección sindical considera apropiado que o Executivo galego mova ficha pois até o de agora, segundo denuncia, a súa labor estivo marcada pola “pasividade e desidia ante a posibilidade de que a obra para rematar” a embarcación “escape para Santander” cando a adxudicación para a industria da comarca estaba moi próxima.
Así, instan á Consellaría de Industria a actuar, pois a administración pública do país fornecera apoio financeiro para rematar o barco. En concreto, uns oito millóns de euros “en créditos participativos” para ter listo este buque que estaba a ser construído en Barreras.
A xuízo da representación das e dos traballadores, o departamento que dirixe Francisco Conde ten que impedir “que vexamos pasar o barco diante das nosas costas” cara outro territorio.
"Sen ser unha obra extensa, é un novo fito neste mercado de cruceiros de luxo que, aínda que no contexto de pandemia está en mínimos, conta cun alto grao de crecemento no futuro", entenden desde a CIG, pois as instalacións de Fene son quen de acometer as actuacións que quedan pendentes.
Fan referencia, así, tanto á disposición dun dique como ás oficinas e ao espazo para contedores... Avisan de que, de non lograr carga de traballo para o pintado e “a carenaxe”, a factoría quedará en pouco tempo libre. “Logo de evitar que o barco fora para Cádiz, unha vez máis podemos estar ante a inutilidade, a pasividade e a inoperancia, da Xunta da Galiza no que ten a ver coa industria nesta comarca", lamentan.
Cómpre recordar que o futuro industrial da zona está no aire e hai meses que se suceden as protestas polo feche de Siemens-Gamesa nas Somozas e os problemas de continuidade de Endesa nas Pontes, entre outros.
