As oficinas de Unicaja encaran esta sexta feira a primeira xornada de folga convocada polos sindicatos en protesta polo ERE exposto pola entidade financeira, que afecta ao 18% do persoal que traballa nos 9 centros que ten na Galiza.
Nun comunicado, UXT chama á mobilización dos traballadores para expresar o seu malestar contra un ERE que cualifican de "salvaxe" e que supón o despedimento de 1.513 empregados en todo o Estado español, ademais dunha "homologación á baixa" nas condicións laborais e a fixación dun réxime de traslados "moi afastado" do establecido no convenio colecti-vo.
Así o remarca a central sindical, que sitúa en 18% do persoal dos nove centros de Unicaja na Galiza os afectados polo ERE exposto desde a compañía.
Ademais de apelar aos empregados para secundar a folga, UXT pide comprensión á cidadanía que poida verse afectada polos paros.
"A prestación dun servizo de calidade ás usuarias e usuarios esixe que Unicaja Banco non destrúa emprego en Galiza. Só unha participación masiva e contundente na xornada de folga, logrará cambiar o rumbo da empresa na mesa de negociación", incide UXT nun comunicado.
A banca destruíu 5.500 empregos e fechou máis da metade das oficinas na última década na Galiza
As entidades de crédito perderon 5.500 traballadoras e traballadores na última década na Galiza. Os procedementos de despedimento colectivo anunciados polo Banco Santander, BBVA e Caixabank van significar a perda de practicamente 600 empregos nos próximos meses na Galiza. Á cabeza das saídas sitúase o grupo Santander, a segunda entidade do país, cunha forte presenza territorial derivada da absorción do Banco Pastor e que vai desfacerse de 370 empregadas e empregados e fechar arredor de 80 sucursais.
Ao tempo, os Expedientes de Regulación de Emprego (ERE) actualmente en fase de consulta adiantan 111 despedimentos no BBVA e entre 90 e 100 en Caixabank, o terceiro operador bancario da Galiza.