Hai 23.000 persoas menos con emprego na Galiza que hai un ano. É un dos datos que fornece a Enquisa de Poboación Activa (EPA) do terceiro trimestre que se publicou hoxe, terza feira, polo INE.
O paro subiu en 2.300 persoas, o que supón un 1,61% máis que no trimestre anterior, case nove puntos menos que a media estatal. Desta forma, as e os desempregados na Galiza atinxen os 144.800, que son 1.400 persoas máis que no terceiro trimestre de 2019 (+0,94%).
Pola súa banda, as e os ocupados galegos, 1.082.600 en total, son 32.200 máis que no segundo trimestre (+3,06%), pero 23.100 menos que no mesmo período do ano pasado (-2,09%).
Así as cousas, a taxa de paro na Galiza sitúase no 11,8%, mentres que a taxa de actividade ascende ao 52,48%. Por sexos, o desemprego acada o 13,04% en mulleres (cun 47,64% de taxa de actividade) e o 10,68% en homes (57,75% de actividade).
Na Galiza as persoas activas aumentaron en 34.500 no terceiro trimestre respecto ao segundo (+2,89%), até 1.227.400, que, en calquera caso, son 21.800 menos que no terceiro do pasado exercicio (-1,74%).
A poboación de 16 anos e máis na Galiza, 2.339.000 persoas, repuntou en 200 en taxa intertrimestral (+0,01%), e en 3.100 en variación interanual (+0,13%).
No conxunto estatal, o desemprego incrementou en 355.000 persoas no terceiro trimestre, un 10,5% máis que no trimestre anterior e a ocupación creceu en 569.600 postos de traballo (+3%), o seu maior aumento trimestral de toda a serie histórica.
