Un grupo de sindicalistas históricos da cidade de Vigo fixo pública esta segunda feira a súa petición para que o Concello dedique un "espazo público" na cidade a lembrar as folgas de 1972, así como os homes e mulleres que, a pesar da dura represión do franquismo, loitaron por conseguir melloras laborais e democráticas.
Trátanse de antigos traballadores e traballadoras de empresas como Citroën (agora Stellantis), El Corte Inglés, Grupo de Empresas Álvarez ou Vulcano (agora Estaleiros San Enrique).
Nunha comparecencia ante os medios de comunicación, os sindicalistas subliñaron a transcendencia desas semanas de mobilización en setembro de 1972, con protestas duramente reprimidas polas forzas e corpos policiais e pola administración estatal.
Ademais da represión que se viviu nas rúas de Vigo, a loita sindicalista acabou co despedimento de medio centenar de traballadores e traballadoras, e con represalias a líderes sindicais, algúns dos cales tiveron que "pasar á clandestinidade".
Lembranza e recoñecemento
A xuízo deste grupo de sindicalistas, as protestas daqueles días de 1972, que supuxeron a continuación das mobilizacións iniciadas en Ferrol en marzo dese mesmo ano, “deben ser lembradas e recoñecidas”.
Segundo trasladaron na rolda de prensa, esa homenaxe é especialmente importante este ano, xa que se cumpre o 50 aniversario desa "loita" obreira, que paralizou a planta de Citroën, os estaleiros e outras empresas da cidade.
Aseguran que "é necesario e de xustiza" lembrar esa folga "que foi exemplo para outras cidades do país", e manifestaron que o compromiso do alcalde de Vigo, Abel Caballero, de aprobar unha declaración institucional, "non é suficiente". A promesa foi acadada nunha reunión mantida a semana pasada entre os sindicalistas e o rexedor da cidade olívica.
Neste sentido, piden que a cidade dedique "un espazo público" que "sirva de recoñecemento" ao ocorrido en 1972 "e como recordo para as futuras xeracións" da súa contribución "á conquista de liberdades e da democracia".
