A folga das dependentas de Inditex fai visíbel as "rebaixas" dos seus dereitos

A conflitividade semella terse instalado nas tendas de Inditex na Galiza. nos últimos anos Esta quinta feira, as dependentas dos algo máis de 20 estabelecementos que teñen as nove marcas do grupo na provincia da Coruña volveron á folca case dous anos depois para reclamar que a multinacional e cumpra o acordo asinado e retome a mesa de negociación. Fontes da CIG -a central sindical que conta con 70% de representación no comité- aseguran que a participación foi de 99% do seu persoal, unhas 1.400 traballadoras. O paro estivo acompañado de varias accións informativas que comezaron a primeira hora no Centro Comercial As Cancelas de Santiago, seguida dunha manifestación polo centro da cidade´, e outro no Centro Comercial Odeón de Narón (Ferrolterra). Na cidade da Coruña, as accións decorreron pola mañá na rúa Compostela e pola tarde no interior do Centro Comercial Marineda City, situado no polígono da Grela. Vigo sumouse á protesta cunha mobilización diante da tenda de Zara na céntrica rúa do Príncipe. Por outra parte, tamén esta quinta feira, persoal das tendas da cadea Women Secret secundaron unha xornada de folga para reclamar "máis contratacións, mellores salarios e menos discriminacións entre cadeas". Na Coruña, houbo unha protesta na praza de Lugo e para o 5 de xullo está convocada outra en Santiago. As dependentas de Inditex seguirán a protesta e farán folga o 27 de xuño, no inicio das rebaixas Seguimento absoluto A presidenta do comité de empresa de Zara na Coruña, e traballadora desa marca desde hai 22 anos, Carmen Naveira, participou na acción informativa de Santiago e asegura a Nós Diario que “o seguimento é absoluto” con moitas tendas “fechadas, como no caso de Lefties ou Pull &amp; Bear, e outras abriron só coa presenza das persoas responsábeis”. Días antes, a empresa enviou un comunicado ao persoal para lembrarlles o seu dereito ao traballo e que, se participan na folga, se lles descontará "a retribución correspondente e a parte proporcional das pagas extras, así como a cotización á seguridade social". Para a CIG, este aviso "buscaba evitar o impacto da reivindicación" algo que, din, "non nos sorprende así como que evite falar dos dereitos das traballadoras". Neste sentido, a central sindical tamén denuncia a utilización de persoal eventual e cambios de horarios para tentar desmobilizar o persoal e minimizar o éxito da folga. As reivindicacións En relación ás reivindicacións das traballadoras de Inditex nesta folga, a delegada da central nacionalista explica que se trata de cuestións que quedaron pendentes da anterior negociación e que xa ten recoñecidas o persoal doutras empresas do grupo coa mesma cualificación e convenio. “Trátase das axudas, antigüidade, plus do traballo en tardes e sábados, bono comedor ou equivalente e redución da xornada por idade”, enumera Naveira, “ademais, unha reclamación fundamental refírese á homoxeneización e á equiparación de todas as condicións entre as distintas cadeas”, agrega. Neste sentido, apunta que o trato é diferente en relación aos seus calendarios, libranza dos sábados, licencias e descansos, xornadas e mesmo categorías. “Consideramos que é inxusto e discriminatorio que dentro da mesma provincia teñamos condicións diferentes polo simple feito de traballar nunha cadea ou noutra". As dependentas de Inditex, desaloxadas da sede de Arteixo Conflitividade en Inditex As dependentas de Inditex na Coruña levan varios anos reivindicando os seus dereitos dentro do grupo. Pouco despois de acceder Marta Ortega á presidencia da multinacional, en abril de 2022, as traballadoras manifestáronse o 6 de novembro e realizaron unha folga o 25 dese mesmo mes coincidindo co Black Friday e conseguir un preacordo que desconvocou outra prevista para o 23 de decembro dese ano. Un mes despois, volvían á folga tras o anuncio do feche dunha tenda de Massimo Dutti no Centro Comercial As Cancelas de Santiago, os Bershka de Vilagarcía (O Salnés) e Pontevedra máis o Kiddy’s Class de Vigo, unha medida que afectaba un total de 45 traballadoras. O 7 de abril de 2024, centos de traballadoras de Inditex manifestáronse na Coruña para exixir melloras laborais e sociais e un mes despois, sería o persoal de Zara Loxística quen se mobilizaría polo que consideraban “un incremento do pactado”. A última protesta decorreu este pasado 15 de maio co feche nas instalacións da sede central que a multinacional ten no polígono de Sabón, en Arteixo (comarca da Coruña) de 19 traballadoras de diferentes tendas de Inditex. O encerro durou catro días e rematou despois que a compañía ameazara con iniciar accións xudiciais e chamara á Garda Civil para o desaloxo. As traballadoras de Inditex fechadas en Arteixo: "Non nos moveremos até que nos desaloxen á forza ou abran unha negociación" A mesa de Madrid Tras o feche na sede de Inditex tivo lugar un Madrid unha reunión da multinacional cos sindicatos a nivel estatal na que está convidada a CIG máis quen ten máis representación a nivel estatal é CCOO. Precisamente, a central nacionalista criticou durante todos estes meses que non se teña en conta as reivindicacións que se realizan, a nivel provincial, desde A Coruña. Segundo Carmen Naveira, nesta última xuntanza “avanzouse no tema de xornada por idade” mais non aconteceu o mesmo noutras reivindicacións. Porén, recoñece que “para nós non hai cambios no plus de tarde, no tícket comedor, nas axudas sociais e na equiparación entre cadeas”. Recoñecer a antigüidade “A pesar de que fixemos un esforzo grandísimo e rebaixamos as nosas exixencias iniciais coa intención de chegar a un acordo, Inditex négase a negociar unhas cantidades que premien e incentiven a nosa antigüidade de anos”, afirman desde a CIG. A última oferta da multinacional, segundo a central nacionalista, rexeita introducir un plus de antigüidade nos sete primeiros anos de traballo e poñelo, dos oito aos 11 anos, en 13,69 euros/mes. Os seguintes catro anos rebaixaría o plus a 2,20 euros/mes e deixaría sen engadilo dos 16 aos 24 anos de antigüidade. A partir dos 25 anos, o plus sería de 93,33 euros/mes. "Non pode ser que sigan castigando ás traballadoras do grupo Inditex deixándonos sen as axudas sociais que ten o persoal doutros departamentos", conclúe Naveira. Delegadas da CIG en Inditex inician un feche na sede central en demanda dunha negociación provincial O comité exixe que Inditex cumpra “Nas próximas semanas de acordo co resto de RLPTs procederemos a constituír o marco provincial para avanzar nesta nova negociación colectiva”. Con esta frase remataba a carta que Inditex contestaba o 12 de decembro de 2023 a petición da CIG de iniciar conversas para mellorar as condicións de traballo nas súas tendas a nivel provincial, a principal reivindicación da que dependen as demais que demandan desde a central nacionalista. E neste tema, segundo explica a Nós Diario a presidenta do comité de Stradivarius, Lucía Domínguez, "a multinacional asegúranos que é CCOO quen non lles deixa negociar a nivel provincial por ter maior representatividade no conxunto do Estado español". Con todo, para a CIG en realidade negociar en Madrid "é unha estratexia para non mellorarnos as condicións".