Tres traballadores despedidos no centro residencial San Vicente de Paúl, en Lugo, segundo a dirección por causas disciplinarias. Mais os sindicatos non acreditan nesa razón e falan, como CIG-Ensino, de “ un caso claro e contundente de represión sindical”. Explican que a coidadora despedida é a persoa que encabeza a candidatura da CIG para as eleccións sindicais que se van facer por primeira vez no centro o día 29 de maio.
CIG-Ensino denuncia que o 28 de abril, “despois de varios días de presión psicolóxica”, a dirección deste centro entregoulle a carta de despedimento a tres traballadoras: unha coidadora e dúas enfermeiras.
Dende o momento no que se efectuou o preaviso de eleccións sindicais no centro, afirma este sindicato, “a presión psicolóxica e as prácticas represivas exercidas sobre os traballadores fanse máis patentes e son o pan de cada día no centro”.
O centro está rexido por unha congregación relixiosa (Fillas da Caridade), está conveniado coa Consellería de Política Social, e recibe cartos públicos para o seu funcionamento.
Esta cuarta feira, 10 de maio, ás 11:30, hai unha concentración diante do Centro en solidariedade coas traballadoras despedidas.