A demanda de emprego digno na propia terra toma a rúa no Día da Clase Obreira Galega

Manifestacións nas principais cidades do país convocadas polas centrais sindicais clamaron polo dereito ao traballo. Ferrol congregou os actos centrais do 10 de marzo. 

10 marzo
photo_camera Manifestación en Vigo [CC BY-NC-SA CIG-Avantar]

Polas rúas de Vigo, Ferrol e Compostela camiñaron centos de traballadoras e traballadores que reivindicaron o seu dereito a vivir e traballar na propia terra. Con motivo do Día da Clase Obreira Galega as manifestacións convocadas pola CIG, dunha banda, e por CC.OO-UGT-USTG por outra, congregaron a centos de persoas. 

A central sindical nacionalista, que desenvolveu tamén mobilizacións en Compostela e Vigo, congregou a centos de persoas a prol do "Emprego en Galiza", lema co que convocaron á cidadanía neste 10 de marzo. Desde a CIG quixeron dar continuidade á campaña que veñen desenvolvendo desde finais do pasado ano e que está a promover unha Iniciativa Lexislativa Popular que rematará no Parlamento. 

Através da recollida de sinaturas e de mocións presentadas en todos os concellos do país, desde a Confederación Intersindical Galega instan a Xunta a desenvolver 100 medidas para o crecemento económica e a creación de emprego. Eixos, estes, arredor dos que xirou tamén a conmemoración do Día da Clase Obreira Galega. 

O acto central, do que tomou parte o secretario xeral da CIG, Suso Seixo, tivo lugar como é tradicional na cidade de Ferrol, lugar onde foron asasinados Amador Rei e Daniel Niebla. Mais que nos últimos anos está a gañar relevancia pola dramática situación que atravesa a comarca de Ferrolterra ao ser esta a que maior emprego destruiíu e que acolle maiores taxas de desemprego de todo o Estado. 

Face o "empobrecemento masivo da poboación", din desde a CIG "temos alternativas"

"Gobernar os nosos recursos" face "a caída dos salarios" e a emigración

Desde a CIG quixeron salientar neste 10 de marzo que ao igual que en 1972 "hoxe vivimos outra ditadura" caracterizada por "un réxime ateigado de corrupción que goberna a favor dos máis ricos, dos bancos e das grandes empresas". Unha realidade que deita as maiores taxas de desemprego da historia de Galiza e unha nova vaga de emigración xuvenil por volta de 100.000 moz@s nos últimos anos. Aliás, os "recortes en sanidade" e educación, "a caída dos salarios" ou as políticas antisociais promovidas pola dereita española e galega, deveñen nun "empobrecemento masivo da poboación" que contrasta cos "80.000 millóns de euros" entregados "para axudar á banca privada".  

para a central sindical nacionalista "face esta realidade" urxe un cambio de rumbo nas políticas económicas, razón pola que están a promover a ILP a prol do emprego. "Temos alternativas e un futuro digno" lembraron, mais "necesitamos gobernar os nosos recursos" e "defender os nosos intereses". Un horizonte, din, ao que non poderán chegar se "España e Europa continúan espoliando as nosas riquezas". 

Apupos ao alcalde de Ferrol na ofrenda floral de CC.OO-UGT-USTG
Os actos do 10 de marzo comezaron a primeira hora da mañá coa tradicional ofrenda floral convocada por CC.OO perante o monolito que lembra os dous traballadores asasinados en 1972. Face o recordo a Amador Rei e Daniel Niebla, @s líderes de CC.OO, UGT e USTG quixeron lembrar, xunto co alcalde de Ferrol, a figura dos dous operarios ferroláns. Porén, un grupo de traballadores non permitiron que o rexedor pronunciase o seu tradicional discurso ao berro de "Amador, Daniel a loita continúa". 

Comentarios