O Congreso rexeita a indemnización de 45 días nos despedimentos improcedentes

O Congreso do Estado español rexeitou unha moción de Esquerra Republicana (ERC) para recuperar a indemnización de 45 días por ano traballado cun tope de 42 mensualidades en caso de despedimento improcedente. A iniciativa non prosperou nunha votación inusual na Cámara Baixa. O erro dun deputado do PP salva a reforma laboral de PSOE e Unidas Podemos Mentres que Unidas Podemos votou a favor xunto con outras forzas políticas como o BNG, Bildu, ERC, Más País ou Compromís; o PSOE votou en contra ao igual que fixeron PP, Ciudadanos e PDeCat. Por outra parte, tanto Vox como PNV e Junts optaron pola abstención. Desta maneira, Unidas Podemos votou a favor da proposta de ERC, a pesar de que a ministra de Traballo, Yolanda Díaz, pertencente a esta formación, non incluíu esta medida na última reforma laboral. Sen ter en conta esta cuestión, a portavoz de En Comú Podem, Aina Vidal, afeou durante o debate o BNG e ERC o seu voto en contra da reforma laboral de 2021. O PSOE, a pesar da promesa [antes de acceder ao Goberno español] do seu secretario xeral e actual presidente do Estado, Pedro Sánchez, de que "o primeiro que fará o PSOE será derogar a reforma laboral de Mariano Raxoi [anterior xefe do Executivo estatal] para recuperar os dereitos dos traballadores", votou en contra da medida proposta polo grupo republicano catalán para retomar a indemnización de 45 días por ano traballado con un tope de 42 mensualidades por despido improcedente, que actualmente situase en 33 días cun límite de 24 mensualidades. As diferenzas de PSOE e Unidas Podemos sobre este punto xa se apreciaron no debate da moción que tivo lugar na cuarta feira. Mentres que o grupo socialista desdeñou a proposta por considerala un "chío" e un "brinde ao sol", Unidas Podemos apoiouna baixo o argumento de que no Estado español o despedimento é "demasiado" barato. A portavoz do PSOE, Mercè Perea, defendeu durante o debate que unha indemnización ten que ser "xusta, equilibrada e disuasoria", mais tense que acordar no marco do diálogo social, que é segundo a deputada socialista, onde "ten que residir unha reforma deste tipo". En concreto, a proposta propuña derrogar as modificacións lexislativas introducidas en materia de despedimento improcedente tanto na reforma laboral de 2012, do Goberno de Raxoi; como na de 2010, do Goberno do ex presidente socialista José Luis Rodríguez Zapatero. A Iniciativa pedía derrogar as modificacións en despedimento improcedente A moción tamén instaba a analizar en profundidade a doutrina do Comité de Dereitos Sociais sobre o dereito do persoal traballador "despedido sen razón válida a unha indemnización adecuada ou outra reparación apropiada", recoñecido no artigo 24 da Carta Social Europea. Por parte do PP, a vogal da Comisión de Traballo, Belén Hoyo, advertiu que levar a cabo a proposta de ERC "poría en risco a chegada de fondos da Unión Europea (UE) ao Estado español", que "destruiría a economía" e que "rompería a normalidade das relacións laborais" entre persoal traballador e empresas. O portavoz do BNG no Congreso, Néstor Rego, aludiu a que "a semana pasada nos sorprendeu Yolanda Díaz admitindo que o despedimento é demasiado barato e que hai demasiada facilidade por parte dos empresarios para despedir". Ao respecto, tirando de "brincadeira", Rego subliñou que é "unha magoa que esta muller [en alusión a Díaz] non sexa ministra de Traballo para facer algo ao respecto, por exemplo aproveitar a maioría parlamentaria que hai nesta Cámara para derrogar de unha vez por todas e de forma integra a reforma laboral regresiva do Partido Popular [no ano 2012]". Derrogar a reforma laboral "En breve virá a esta Cámara unha iniciativa conxunta de Bildu, ERC e o BNG para eliminar as facilidades para o despedimento, para recuperar a indemnización dun mínimo de 45 días, para recuperar os salarios e para recuperar tamén a autorización administrativa dos ERE [Expedientes de Regulación de Emprego]", adiantou o nacionalista. A intención dos tres grupos soberanistas con esta Proposta de Lei para a recuperación e ampliación de los dereitos laborais é forzar a derrogación da reforma laboral do PP en 2012. O BNG impulsará un proxecto de lei no Congreso para derrogar a reforma laboral do PP "O 10 de febreiro do 2012 o Goberno presidido por Mariano Raxoi aprobaba o Real Decreto-lei 3/2012, de medidas urxentes para a reforma do mercado laboral, consolidando o anterior Real Decreto-lei 10/2010, do 16 de xuño, adoptado polo Goberno de José Luis Rodríguez Zapatero. Aquela reforma laboral cambiaría de raíz o mercado de traballo, suspendendo dereitos laborais básicos adquiridos polos traballadores e as traballadoras e provocando un enfraquecemento da negociación colectiva definida pola condición laboral", sinala a Proposta de Lei na súa exposición de motivos. A proposta de lei do BNG, Bildu e ERC busca ampliar dereitos laborais En consecuencia, conclúe o texto da iniciativa das tres formacións soberanistas, "é necesario e perentorio, nunha situación de inestabilidade económica e social como a actual, nunha situación de incerteza xeneralizada, protexer as persoas traballadoras ofrecendo estabilidade e seguridade no emprego e as súas condicións de vida". As centrais sindicais apoian encarecer os despedimentos O secretario confederal de Emprego da CIG, Francisco González Sío, en declaracións a Nós Diario, sinala que "hai que reclamar que as reformas laborais de 2012 do PP e de 2010 do PSOE sexan derrogadas". Carril: “A reforma laboral de 2012 queda intacta” Neste sentido, apunta a necesidade de "volver ás condicións anteriores tanto no despedimento improcedente como no obxectivo, pois un indemnización de 20 días por ano traballado por un máximo de 12 meses dá moita facilidade ás empresas". González Sío destaca tamén a importancia de "recuperar a prioridade de aplicación dos convenios de sector, así como a dos convenios sectoriais provinciais sobre os estatais". Despedimento colectivo A responsábel de emprego de CCOO, Maica Bouza, en conversa con este xornal, coincide con González Sío no referente á "recuperación da autorización administrativa dos despedimentos colectivos [como no caso dos ERE]". Bouza amosa un apoio total á proposta de estabelecer os 45 días de indemnización por despedimento improcedente, "que ficou pendente na reforma laboral, mais quedou aparcada, non desbotada". A responsábel de CCOO destaca a presentación en conxunto con UXT dunha reclamación ante o Comité Europeo de Dereitos Sociais do Consello de Europa polo incumprimento da Carta Social Europea polo prezo dos despedimentos.