O Comité Europeo de Dereitos Sociais (CEDS), entidade adscrita ao Consello de Europa, vén de difundir as súas conclusións relativas ao pasado ano 2022 a respecto do cumprimento dos preceptos dispostos na Carta Social Europea (CSE), documento que entrou en vigor en 1965 e que foi sometido a unha profunda actualización de obxectivos tres décadas despois. Aborda neste documento os artigos incluídos no apartado de Dereitos laborais, que está conformado, entre outros, polo dereito a unhas condicións de traballo xustas (artigo 2 da Carta), o dereito a unha remuneración digna (artigo 4) e o dereito á negociación colectiva (artigo 6).
Estas conclusións foron elaboradas a raíz dos informes remitidos polo Goberno español para o período de referencia 2017-2020 e das alegacións presentadas por diferentes organizacións sociais e sindicais, entre elas CCOO, UXT ou a CIG. Esta última central sindical chama a atención agora sobre uns resultados "novamente negativos", pois das 17 situacións avaliadas, oito conclusións son de non conformidade no cumprimento do disposto na CSE e seis de conformidade.
A maiores, outras tres relacionadas cos dereitos á sindicación, á negociación colectiva e a participar na determinación e mellora das condicións e a contorna de traballo, "non puideron resolverse por falta de información suficiente", cuestión esta que o Comité considera "un incumprimento da obriga de información contraída polo Estado español en virtude da Carta de 1961", salienta a CIG.
Xornada laboral
Entre outras cuestións, o informe final do CEDS lamenta que unha semana laboral total, no marco de "normativas de flexibilidade" e para determinadas categorías, pode alcanzar até 60 horas semanais ou superar as 60 horas por semana, o que "non é razoábel".
Vacacións
Outro aspecto que valora o Comité é a vulneración no Estado español do dereito a gozar de, cando menos, un período anual de vacacións ininterrompidas de dúas semanas. Este incumprimento, recolleu a CIG nas súas alegacións, prodúcese tamén no sector público.
Negociación colectiva
Sobre o dereito á negociación colectiva, subliña que se vulnera no Estado o apartado 2 do artigo 6, pois, incide o sindicato, "a lexislación permítelle ás empresas non aplicar unilateralmente as condicións pactadas nos convenios colectivos". Indica, ademais, que "a lexislación autoriza o Goberno a impor a arbitraxe para pór fin a unha folga nos casos que superen os límites estabelecidos polo artigo 31 da Carta de 1961".
Preaviso en contratos de proba
O Comité tamén cuestiona que na lexislación española non se contemple un período de aviso previo para notificar ás persoas traballadoras a extinción dun contrato en período de proba. As leis en materia laboral, de feito, seguen sen axustarse ao disposto na Carta Social Europea.
Salarios
O Goberno español acordou recentemente subir a 1.080 euros mensuais, en 14 pagas, o salario mínimo interprofesional (SMI), a fin de equiparalo a 60% do salario medio, tal e como recolle a CSE. Porén, o comité, no momento da avaliación —previo á adopción desa medida—, sinala que o SMI segue a ser insuficiente para garantir unhas condicións de vida dignas.
"As conclusións son a evidencia de que na lexislación laboral española, reforma laboral tras reforma laboral, seguen vixentes normas e regulamentacións que deben axustarse á Carta Social Europea. Confírmase unha vez máis, o que desde a CIG vimos reclamando sobre a necesidade do cumprimento xa polo Estado español da Carta", precisa o secretario xeral da central sindical, Paulo Carril.
