CIG afirma que “sobran razóns” para que as galegas vaian á greve do 8 de marzo

Redacción

20/feb./18 - 13:20 Actualizado: 27/feb./18 - 11:19

Seguinte

Hai motivos abondo para que as mulleres de Galiza participen o vindeiro 8 de marzo no Paro Internacional de Mulleres. É a mensaxe que esta terza feira trasladou a secretaria das mulleres da CIG, Margarida Corral, que canda Natividade López, responsábel do gabinete de Economía do sindicato, presentou os datos do informe ‘Muller e mercado laboral’. “Paramos porque non podemos seguir aturando tanta discriminación e violencia. Porque hai que concienciar do traballo que fan as mulleres, de que o noso papel na sociedade non é subsidiario”, afirmou Corral.

Corral lembrou que a CIG xa rexistrou, o pasado 29 de xaneiro, a convocatoria de paros parciais en cada unha das quendas: de 00:00 a 2:00 horas da madrugada; de 12:00 a 14:00 horas e de 19:30 a 21:30 horas para que todas as mulleres poidan sumarse á greve convocada no traballado asalariado, mais tamén á de consumo, a de brazos cruzados nas tarefas de coidado, ao boicot ás empresas con publicidade ou reclamo sexista e a mobilizarse nas múltiples convocatorias previstas no país.

Natividade López Gromaz, responsábel do Gabinete de Economía da CIG, indicou que a fenda salarial entre homes e mulleres situouse o ano pasado en 22,3%, cun incremento de dúas décimas respecto de 2016. Unha fenda que López Gromaz atribuíu ao “trato privilexiado que o mercado laboral ofrece aos homes” e á “feminización dos empregos máis precarios e con salarios máis baixos”, aos complementos discrecionais, ao acceso minoritario de mulleres a postos de alta responsabilidade ou a maior presenza dos contratos a tempo parcial nas mulleres.

Esa discriminación salarial é ademais “xeneralizada en todas as ramas de actividade”, denunciou e, de media, supón que unha muller ingresa 4.513 euros menos ca un home. Aliás, 20.7% das mulleres asalariadas percibiron uns ingresos inferiores á metade do SMI.

Temporalidade

No ano 2009 o número de traballadoras a tempo parcial representaba 18,2% do total, unha porcentaxe que ascendeu en 2017 a 21,8%. Porén, no caso dos homes, só o 6% tivo este tipo de xornada.

A responsábel do gabinete de economía sinalou tamén que a taxa de temporalidade feminina situouse en 28,7% no ano 2017, mentres que entre os homes foi do 25,2% e asegurou que “cada muller con contrato temporal asinou unha media de 3,8 contratos” durante o pasado ano.

Un total de 98.300 mulleres permanecen paradas no ano 2017, e 40% destas leva máis de 2 anos nesa situación. Apenas 47% das mulleres paradas percibira algún tipo de prestación.

Mobilizacións