A cifra de persoas cun emprego baixou en todos os sectores agás no da construción

A ocupación, é dicir, a cantidade de persoas que se atopaban traballando, diminuíu na Galiza en 800 persoas no primeiro trimestre de 2023 respecto á cifra do trimestre anterior, situándose en 1.103.700 en termos absolutos, segundo os datos da Enquisa de Poboación Activa (EPA) do primeiro trimestre. O desemprego sobe na Galiza en 3.700 persoas Desta forma, a taxa de emprego, a porcentaxe de poboación ocupada con respecto á cantidade de persoas en idade de traballar, situouse en 47%, descendendo unha décima porcentual, o dobre que no conxunto do Estado español (-0,05%), onde esta taxa se situou en 50,78%. Con respecto ao mesmo trimestre do ano anterior, a poboación ocupada aumentou en 12.300 persoas, un incremento de 1,1%, máis de sete décimas porcentuais por baixo do aumento do emprego no Estado español (1,83%). En consecuencia, o ritmo de crecemento da ocupación nese período foi 63,4% maior a nivel estatal. A ocupación masculina aumentou entre xaneiro e marzo, mais diminuíu a feminina. O número de ocupados varóns aumentou en 3.400 persoas respecto ao cuarto trimestre do ano 2022, mentres que a ocupación das mulleres, pola contra, rexistrou unha diminución de 4.300 persoas. En termos relativos, isto tradúcese nun incremento da taxa de ocupación masculina de 0,2 puntos porcentuais e nun decrecemento da taxa feminina de 0,3 puntos porcentuais. Con respecto ao primeiro trimestre do ano 2022, o número de homes ocupados diminuíu en 3.800 persoas (-0,7%), mentres que o de mulleres cun emprego aumentou 3,1%. Entre xaneiro e marzo destruíronse 5.200 empregos no sector primario Atendendo aos sectores de actividade económica, o número de persoas ocupadas neste trimestre diminuíu en todos, agás no da construción, onde aumentou. Na agricultura e pesca, a diminución da poboación ocupada cifrouse en 5.200 traballadores e traballadoras menos (-5,2%) que hai 3 meses. Na industria, a ocupación diminuíu en 900 persoas (-0,9%). Nos servizos a baixada situouse en 200 persoas (-0,2%). Pola contra, no sector da construción a ocupación aumentou en 5.300 (5,3%) persoas respecto ao trimestre anterior. Na comparanza co mesmo trimestre de 2022, a ocupación diminúe na industria (-4,1%) e na construción (-0,3%), mais aumenta no sector primario (6,3%) e nos servizos (2%). Desemprego 3.700 é o número de persoas nas que aumentaron as listas de desemprego da Galiza no primeiro trimestre de 2023 con respecto ao trimestre anterior, o último do ano 2022 No primeiro trimestre de 2023 na Galiza había 135.100 persoas en situación de desemprego, 3.700 máis que no trimestre anterior. Desta maneira, o paro aumentou 2,8%, situándose nunha taxa de 10,9%. Porén, con respecto ao primeiro trimestre do ano 2022, diminuíu en 5.900 persoas (4,2%). No primeiro trimestre de 2023 había 135.100 persoas nas listas do paro O aumento do desemprego foi menor na Galiza que no Estado (3,43%) na comparanza co trimestre anterior, mentres que en termos interanuais o descenso foi maior que a nivel estatal (-1,48%). 30% das persoas desempregadas da Galiza leva dous ou máis anos buscando traballo Porén, segundo afirmou o pasado mes a presidenta da Autoridade Independente de Responsabilidade Fiscal (AIReF), Cristina Herrero, a taxa de desemprego cada vez "é menos representativa do que se quere medir". Esta taxa non inclúe, por exemplo, algúns empregados e empregadas a tempo parcial que queren traballar un maior número de horas, e tampouco os desocupados non inscritos no paro mais que desexan traballar. Unha situación esta última, que ten unha maior incidencia no caso da Galiza, como demostra a menor taxa de actividade, que sinala a porcentaxe de poboación cun emprego ou que está inscrito nas listas do paro en relación a cantidade de persoas en idade de traballar. No primeiro trimestre de 2023 a poboación galega en idade de traballar situouse en 2.346.500 persoas, das cales 1.238.700 clasificáronse como activas, o que deixa a taxa de actividade en 52,8%, moi por baixo desta porcentaxe a nivel estatal, que se sitúa en 58,55%. Desta forma, con respecto ao trimestre anterior, o número de activos e de activas aumentou en 2.800 persoas e a taxa de actividade aumentou 0,1 puntos porcentuais respecto ao cuarto trimestre de 2022. Na comparanza co mesmo trimestre de 2022, o número de persoas activas creceu en 6.300 e a taxa de actividade incrementouse 0,1 puntos porcentuais. Reaccións sindicais Segundo a CIG, a EPA do terceiro trimestre confirma que "máis alá da propaganda do Goberno estatal e dunha situación idílica do mercado laboral, o que están provocando as reformas e contrarrefrormas, ao non se derrogar as anteriores, é un deterioro do mercado laboral na Galiza”. O paro de longa duración na Galiza aumentou 45% nunha década O sindicato chamou a atención sobre "a perda de poder adquisitivo por mor da carestía da vida, a falta de emprego con garantías e o deterioro de servizos públicos" nun contexto no que se produce, segundo a EPA, a caída da poboación ocupada e o aumento das persoas desempregadas. Para a CIG, as cifras demostran que "o sector servizos é o que tira da economía" e que "o modelo económico e laboral e que marcou o Goberno estatal ademais de traer precariedade e pobreza laboral, tamén está traendo paro e non é para nada o futuro, nin a forma de poder ter emprego e salarios dignos”. CCOO puxo o foco sobre "a existencia dun claro nesgo de xénero nas cifras que amosa a enquisa, pois mentres aumentou a ocupación masculina, tamén o fixo o desemprego feminino". Por outra parte, afirmou o sindicato, "a evolución do mercado laboral neste trimestre está marcada pola estacionalidade das contratacións, en concreto polo Nadal e as da temporada de rebaixas". Malia todo, sinalou, "séguense notando os efectos positivos da reforma laboral". 35,3% a porcentaxe de poboación en desemprego que está nesta situación por longa duración, é dicir, que leva un ano ou máis en busca activa dun posto de traballo Pola súa parte, para UXT, os datos da EPA "mostran unha aceleración da creación de emprego e unha nova confirmación da mellora da calidade dos postos laborais creados". Non obstante, o sindicato lembrou que "o mercado de traballo adoece aínda de deficienzas que requiren correccións para aumentar o benestar e a xustiza social", en referencia á elevada taxa de paro de longa duración na Galiza, de 35,3%, e á alta porcentaxe de parcialidade no país, de 14,1%. Os fogares con todos os membros no desemprego aumentan en 4.900 57.200 son os fogares galegos nos que todas as persoas activas se atopan en situación de desemprego, o que supón un aumento de 9,4% con respecto á cifra do anterior trimestre No primeiro trimestre de 2023, o número de fogares galegos nos que todos os seus membros estaban en situación de desemprego aumentou en 4.900 unidades (9,4%) e situouse nun total de 57.200. Respecto ao primeiro trimestre de 2022, esta tipoloxía de fogares incrementouse 12,8%. Pola súa parte, o número de fogares nos que todos os seus membros estaban ocupados diminuíu nun total de 400 unidades.