xoves 02.07.2020

Cae a inserción laboral das persoas con discapacidade

A Confederación Galega de Persoas con Discapacidade (Cogami) detecta un descenso de 81% nas ofertas laborais para este colectivo.
Unha persoa participante no programa de emprego de Down Galicia no seu posto de traballo (Down Galicia).
Unha persoa participante no programa de emprego de Down Galicia no seu posto de traballo (Down Galicia).

A crise do coronavirus fixo moito dano no emprego e tamén afectou á inserción laboral de persoas con discapacidade. Segundo a Confederación Galega de Persoas con Discapacidade (Cogami), entre o 16 de marzo e o 29 de abril, este indicador caeu 24% en relación aos datos do mesmo período de 2019.

Ademais, segundo sinala a entidade nun comunicado, o seu servizo de intermediación laboral advertiu un descenso de 81% nas ofertas de traballo de empresas para este colectivo.

Neste senso, Cogami lembra que a crise económica iniciada en 2008 levou a que a taxa de desemprego de persoas con discapacidade se incrementase en 25%, polo que avisa do risco de que a situación actual afecte de novo a estas traballadoras. De feito, a organización apunta que os datos máis recentes sitúan a taxa de actividade destas persoas en 29,9% na Galiza.

Ante esta situación, Cogami insta a Administración a apostar na reserva de contratos para persoas con discapacidade e a continuar a adxudicación de axudas para a adaptación de postos de traballo ás súas necesidades. Tamén reclama un seguimento das empresas con máis de 50 empregados para comprobar se actúan deste modo.

Por outra banda, 72,5% das integrantes da bolsa de emprego de Down Galicia accederon a un posto de traballo en 2019, o que supón un incremento de 23% respecto ao ano anterior. Esta entidade informa de que o número de participantes no Programa de Emprego con Apoio da Federación Down Galicia que estiveron contratadas en empresas da súa contorna no último ano ascende a 177, unha cifra que leva seis anos en constante aumento.

En total, 244 participantes sumáronse á iniciativa, o que, a xuízo da entidade, amosa a importancia que outorgan as persoas con síndrome de Down e outras discapacidades a contar cun posto de traballo. Ademais de que a inclusión laboral contribúe á eliminación de tópicos asociados a este colectivo.

comentarios