Escasas semanas despois de que a ministra de Traballo, Yolanda Díaz, representación das patronais e os sindicatos UXT e CCOO asinaran unha nova reforma laboral que ten que pasar o corte do Congreso, o BNG advirte daquelas liñas vermellas que non vai permitir.
Se desde o primeiro momento o Bloque foi moi crítico coa modificación por entender que non se recuperaban dereitos laborais retirados polos gobernos estatais do PP, esta sexta feira o deputado Néstor Rego incidiu nas exixencias da formación para apoiar o texto.
O nacionalista advertiu de que non secundará a "convalidación do decreto lei" se o Goberno do Estado non se abre a pactar novos cambios como a "recuperación da indemnización de 45 días" por ano traballado en caso de despedimento improcedente.
Para o Bloque Nacionalista Galego non só é oportuno retomar esa garantía para as operarias e operarios, senón que o máximo debe estabelecerse nos 42 meses. Ao fío desta consideración, demandan que sexa menos sinxelo botar ao persoal.
Por outra parte, reclámase que de novo sexa indispensábel ter a autorización previa da autoridade laboral para levar a cabo despedimentos colectivos en calquera compañía.
Outras condicións son os salarios de tramitación por despedimento, pois para Rego debe ser preciso o acordo para cambiar os convenios, eliminando a posibilidade de incumprimento ou cambio das condicións estabelecidas polas empresas; o recoñecemento dos convenios territoriais; ou a validez total dos convenios sectoriais sobre os de cada negocio.
As promesas
"Semella que prefiren incumprir as súas promesas e compromisos para contentar os empresarios á costa dos dereitos dos traballadores e traballadoras", lamentou o representante do BNG.
Por iso chamou á rectificación por parte da coalición de PSOE e Unidas Podemos para "avanzar na recuperación de dereitos". "E iso pasa por acceder a tramitar o decreto como proxecto de lei e por acordar os cambios necesarios", resumiu.