Cadros de persoal insuficientes, non se respectan as ratios de persoal, non hai cobertura do persoal mediante as listaxes de sustitucións temporais que describen desde a CIG nas residencias de persoas maiores da Xunta de Galiza e que se traduce, denuncian, en baixas por sobrecarga de traballo ou estrés laboral entre traballadores e traballadoras.
“Nos centros da provincia da Coruña pode quedar unha enfermeira e dúas auxiliares ao cargo de case 200 residentes con diversos graos de dependencia ou patoloxías psicoxeriátricas, nunha quenda de tarde, de noite ou as fines de semana”, alerta o sindicato . “Moitas veces sen persoal médico para as urxencias e tendo que chamar o 061 para a atención das urxencias”, engaden.
Afirman que a falta de persoal altera horarios e afecta calidade das persoas residentes.“A situación de deterioro xeral na atención os maiores dependentes nas residencias públicas da terceira idade, centros de día, centros de menores e escolas infantís xestionados pola Xunta é insostíbel e inaceptábel e constitúe unha mingua da calidade asistencial e compromete a seguridade e a saúde do persoal”.