Galiza foi o segundo territorio do Estado onde máis emprego se destruíu durante a crise. Perdemos miles de empresas, emigraron ducias de miles de persoas, o mercado laboral precarizouse até niveis moi baixos, quer en condicións, quer en salarios. Os anos de gran recesión deixan un panorama desalentador. Por iso merece atención que haxa persoas que continúen a apostar en erguer proxectos en Galiza. Como Suso, Ana e Ricardo, que impulsan en Chantada Queixerías Airas Moniz. Rural vivo
“Este é un proxecto pioneiro no Estado”, confésanos Suso Mazaira. “Porque temos vacas Jersey, traídas de Dinamarca, que andan ao pastoreo nos prados da Ribeira Sacra. Porque temos un leite cru destas vacas, de grandísima calidade. Porque o queixo ten tona con mofos naturais, e comestíbel”. Están a dar aínda os primeiros pasos após uns cinco anos de traballo e rebordan ilusión. “Temos queixos moi cremosos e que están a ter unha grandísima aceptación”, destacan.
Suso Mazaira explica o porqué de apostar na comarca de onde son. “A innovación está no rural, temos un potencial enorme para facer produtos de altísima calidade. Cada zona de Galiza ten unha especificidade propia, e hai que saber aproveitala”. E teñen un compromiso claro: “Negámonos a crer que o rural non ten futuro, por iso facemos isto”.
[Podes ler a información íntegra no Sermos Galiza 230, á venda no quiosque e na loxa]
