O pronunciamento xudicial produciuse após actuar de oficio o xulgado logo da demanda interposta pola Tesourería xeral da seguridade social. O proceso orixinouse após unha inspección de traballo en outubro de 2012 no que se anunciaba como un centro de masaxes eróticas mais nos que se ofrecían servizos sexuais.
Como resultado iniciáronse dúas investigacións. Unha penal que rematou por ser arquivada após declararen as traballadoras sexuais que desenvolvían a súa actividade libremente, nen forzadas nen sometidas a presión algunha –segundo trascendeu na imprensa catalá. Doutra banda, inicouse un proceso laboral que continuou adiante pola falta de filiación á Seguridade Social das traballadoras. Este expediente foi recorrido pola propietaria do estabelecemento e elevado ao xulgado do social.
Na instrucción as traballadoras declararon ter unha xornada laboral de 12:00 a 22:00 horas e o cobro dunha comisión por servizo. Aliás, aseguraron que a clientela, as instalacións e o material eran fornecidos pola empresa.
Este feito evidencia –segundo os informes policiais e inspección de traballo-- a existencia dunha relación laboral entre as traballadoras e a propietaria da empresa quen acordaba o prezo dos servizos sexuais cos clientes e a fórmula de pagamento, quer en metálico, quer con tarxeta.
A existencia dun vínculo laboral, di o xuíz, “non admite moita discusión” pois ten “os trazos esenciais de todo contrato laboral”
![Publicidade 195255]()
A existencia dun vínculo laboral, di o xuíz, “non admite moita discusión” pois ten “os trazos esenciais de todo contrato laboral”, isto é, “a prestación voluntaria de servizos, retribución e dependencia”, citan desde La Vanguardia a sentenza xudicial.
Un contrato laboral
Perante esta realidade o xuíz entende probada a relación laboral e, continúa o fallo, enmarca este feito nun “marco regulador da prostitución” que fica “na regulación administrativa e a despenalización aplicativa”.
Neste senso, o xulgado entende que as traballadoras deben ver recoñecidos os seus dereitos laborais, a comezar por un contrato mediante o cal seren dadas de alta na Seguridade Social e do que se derivan o correspondente dereito a cobrar o desemprego, a baixa, a atención sanitaria e prestacións por xubilación. Dereitos que xa foron reclamados pola propia Tesourería da Seguridade Social polo tempo en que as traballadoras desenvolveron a súa actividade no suposto centro de masaxes.
A sentenza pode ser recorrida perante unha instancia superior. De ser confirmado o fallo perante o Tribunal Superior de Xustiza de Catalunya sentaría xurisprudencia recoñecendo que as traballadoras sexuais que actúen por conta allea e sen coacción deben ver garantidos os seus dereitos como calquera outra traballadora.
A decisión xudicial espertou as críticas dos sectores que defenden a abolición da prostitución.
