O voto a favor do ex-presidente do Banco Pastor, José María Arias Mosquera, foi o que posibilitou que a Universidade San Jorge, privada e promovida pola arquidiócese de Zaragoza, aterre na Galiza para impartir até catro graos do Centro de Estudos Superiores Galego --Cesuga--.
Se ben foi o Consello da Xunta o que deu o visto e prace definitivo a esta franquicia católica, a decisión viña encamiñada xa dunha votación anterior: a realizada a mediados de febreiro no Consello Galego de Universidades, onde teñen representación a consellaría de Educación e as reitorías das tres universidades públicas galegas. A posibilidade de que o Cesuga pasase a estar adscrito por vez primeira a un centro privado --estábao a unha universidade pública da Irlanda-- saiu adiante por un voto de diferenza: o de Arias Mosquera.
Que ten a ver o ex-presidente do Banco Pastor coa universidade pública?
Para alén de ter presidido o Pastor desde o ano 2001 e de ser patrono de honra da Fundación Fernández-Latorre, isto é, La Voz de Galicia, José María Arias Mosquera tamén é presidente do Consello Social da USC --desde xaneiro de 2014-- e, coma tal, ten un asento reservado no Consello Galego de Universidades, ao igual que acontece cos seus homólogos na U-Vigo e na UdC.
Cómpre sinalar que Arias Mosquera non abandonou o devandito asento malia estar imputado na trama do Banco Pastor. A denuncia dun pequeno accionista levouno perante os tribunais canda Jorge Gost, o ex-conselleiro delegado da entidade absorbida polo Banco Popular . Os dous están imputados por cinco delitos: dous contra o mercado e @s consumidor@s, un de estafa, un de administración fraudulenta e máis outro de falsificación de documentos mercantís para ocultar o estado real de quebra do banco e atraer novos investimentos.
O Cesuga dependerá dun centro privado católico
Voltemos agora á votación no Consello de Universidades. Oito votos a favor, sete en contra e unha abstención avalaron un informe preceptivo para que a Universidade San Jorge desembarcase na Galiza, informe que agora apoiou a Xunta da Galiza malia saír adiante só cun apoio de diferenza e contar o rexeitamento frontal dos reitores das tres universidades públicas. Quen emitiu ese voto que decantou a balanza cara ao si? Arias Mosquera, o ex-presidente do Pastor.
Segundo puido saber Sermos Galiza, o presidente do Consello Social da USC revelou o sentido do seu voto ao interpretar mal unha pregunta dun representante do persoal PAS, quen quería coñecer se o ex-reitor da USC, Senén Barro, apoiara tamén a entrada do centro privado católico. Barro abstívose, mais Arias Mosquera non dubidou en informar de que el propio se posicionou a favor e, de seguido, pronunciar un alegato en favor da universidade privada porque, segundo el considera, crea máis postos de emprego que a pública.
Máis unha imputada no Consello Social da USC
José María Arias Mosquera non é a única persoa imputada que fai parte do Consello Social da USC. Segundo a propia entidade pública, entre @s integrantes hai quen foi nomeado polo Parlamento galego, pola Xunta, polos sindicatos, polas empresas, polos colexios profesionais e polos concellos dos campus.
No caso da USC, con campus en Lugo e Compostela, neste último caso están Luís García e Rebeca Domínguez, concelleira de Educación no goberno local compostelán e imputada na operación Pokemon contra a corrupción. Por certo que entre as designacións achegadas pola Xunta está Blanca de Cora García-Montenegro, filla da presidenta do Grupo El Progreso Blanca García-Montenegro.